Чәй тәме һәм игелек җылысы: «Тылсым» волонтёрлары мастер-класс үткәрде
Чарада балалар шифалы үләннәр белән таныштырдылар, чәй бәйләмнәре әзерләргә өйрәттеләр һәм өлкәннәргә бүләкләр тапшырдылар
Мөслимдә «Тылсым» волонтёрлар отряды укучылар өчен «Татарстан халыкларының чәй традицияләре» дип исемләнгән мастер-класс оештырды. Чарада балалар шифалы үләннәр белән таныштырдылар, чәй бәйләмнәре әзерләргә өйрәттеләр һәм өлкәннәргә бүләкләр тапшырдылар
Чәй традицияләре белән таныштылар
«Тылсым» волонтёрлар отряды үткәргән мастер-класс Татарстан халыкларының чәй әзерләү һәм үләннәрдән файдалану традицияләренә багышланды.
Чара барышында укучылар төбәгебездә борынгыдан ук кулланылган төрле үләннәрнең файдалы үзлекләре турында сөйләделәр. Балалар шулай ук Мөслим районында үсә торган шифалы үләннәр белән таныштырдылар.
Һәркемгә — үзенчәлекле чәй бәйләме
Мастер-классның тагын бер кызыклы өлеше — чәй бәйләмнәре әзерләү булды. Волонтёрлар һәр катнашучыга чәй өчен хуш исле үләннәрне сайлап, үзенчәлекле бәйләмнәр тупларга булыштылар.
Шулай итеп, файдалы мәгълүмат белән беррәттән, балалар үз куллары белән матур һәм истәлекле бүләкләр дә әзерләделәр.
Өлкәннәргә — балалардан җылы бүләк
Яшь волонтёрлар август аенда туган көннәрен билгеләп үтүче әби-бабайларны да игътибарсыз калдырмадылар. Алар өлкәннәр өчен татлы күчтәнәчләр әзерләп, бүләкләр тапшырдылар.
Мөслим картлар һәм инвалидлар интернат-йортында яшәүчеләр балаларның игътибарын һәм кайгыртуын аеруча җылы кабул иттеләр.
Игелеккә илтүче юл
Өлкәннәр яшь волонтёрларга бүләкләре, игътибарлы һәм кайгыртучан булулары өчен ихлас рәхмәтләрен белдерделәр. Шулай ук балаларның остазлары Миннур Зәйнетдинова һәм Инзилә Расиловага рәхмәт сүзләрен җиткерделәр.
Мондый чаралар балаларда өлкән буынга хөрмәт, игелеклелек һәм ярдәмчеллек сыйфатларын тәрбияләргә ярдәм итә. Ә «Тылсым» волонтёрларының һәр шундый гамәле — изгелекнең кечкенә генә булса да, мөһим бер адымы.
Фотолар - Олы Чакмак төп мәктәбеннән.
Безнең телеграм каналга кушылыгыз! Телеграм-канал
Нет комментариев