Заман белән бергә атлый

“Агромастер” җитештерү компаниясе генераль директоры Илгиз Исламовның ярдәмчеллеге һәркемгә мәгълүм. Авыр тормыш хәлендә калучыларга да, катлаулы операцияләргә баручыларга да ярдәм кулы суза ул. Өлешчә мобилизация игълан ителгәч, хәрби операциягә китүче егетләрнең һәркайсына матди ярдәм күрсәтте. Махсус хәрби операциядә катнашучыларны хәзер дә даими төстә кирәк-ярак белән тәэмин итеп тора. Моннан тыш мәгариф оешмаларына һәм хастаханәгә заманча җиһазлар алуда да ярдәм итә. Шул рәвешле район үсешенә инвестиция кертә игелекле райондашыбыз.

Узган ел Илгиз Исламовның район хастаханәсенә эксперт класслы УЗИ аппараты алып бирүе турында язган идек. Аңа кадәр дә ул кислород концентраторлары, хирургия инструментлары, ФГДС үткәрү өчен эндоскопик аппарат һәм башка кирәк-ярак белән тәэмин иткән иде. Быел менә тагын кыйммәтле җиһазлар алуда ярдәм иткән. Районның баш табибы Дамир Сөләйманов яңа медицина җиһазларын район башлыгы Альберт Хуҗинга һәм И.Исламовка гамәлдә күрсәтте.

Эшмәкәр ярдәме белән лабораториягә канны тикшерү өчен биохимик һәм гематологик анализаторлар алынган. Алар канга гомуми һәм биохимик анализ ясау мөмкинлеген бирә. Кан салганда кулланылучы плазманы суыту җайланмасы һәм тромбомиксер алынган.

Хатын-кызлар консультациясенә Илгиз Исламов гинекологик кресло алган. Заманча креслоның уңайлы булудан тыш башка өстенлекләре дә бар, ди табиблар. Стоматология кабинеты да яңа креслолы булган.

– Яңа креслоның стоматологик хезмәтләр спектры күбрәк һәм уңайлырак. Теш бораулау җайланмасының тавышы азрак, әйләнү тизлеге көчлерәк. Суны җылыту мөмкинлеге дә бар, – диде стоматолог Ольга Демьянова, алдынгы компанияләр ясаган заманча җиһазда эшләү мөмкинлеген биргән өчен рәхмәтен җиткереп.

Физиотерапия кабинеты да яңа җиһазларга баеган. Биредә яңа электрофорез һәм башка яңа аппаратлар эшли. Яңа кушетка да кулланылышта. “Ул моңа кадәр кулланылган җайланмалардан күпкә уңайлырак”, – ди шәфкать туташлары.

– Авырган очракта һәркем дә табибларга күренү өчен Чаллыга яки Казанга бара алмый. Табиблар үзебездә дә бар, заманча аппаратурада тикшеренү өчен шәһәр табибларына баралар. Мөслимдә дә анализлар бирергә, компьютер томографиясе, УЗИ үтәргә, ашказанын каратырга, йөрәк яздырырга була. Яңа техника кешегә файда китерсен, гомерне саклап калырга, озынайтырга булышсын! – диде Илгиз Исламов.

Мөмкинлектән файдаланып, баш табиб абортка кадәр консультация кабинетын да күрсәтте. Әлеге бүлмә булачак әниләр белән сөйләшү өчен эшләнгән. Максат – абортларны булдырмау һәм демографик ситуацияне уңай хәл итү. Дамир Сөләйманов соңгы ике елда районда абортлар теркәлмәвен дә билгеләп үтте.

Район башлыгы заманча җиһазлар халыкка озак хезмәт итсен дигән теләкне җиткерде һәм медицина хезмәткәрләрен һөнәри бәйрәмнәре белән котлады. Баш табиб Илгиз Исламовка ТР Сәламәтлек саклау министрлыгының Мактау грамотасын тапшырды.

– Чит ил клиникаларында да шундый ук табиблар эшли. Сездән ярдәм сорыйлар икән, димәк, сез кирәк! Халыкны дәвалагыз! – диде Илгиз Исламов һәм, дөньялар имин булса, киләсе елга хастаханәгә тагын матди ярдәм күрсәтергә вәгъдә итте.

Римма Афзалова фотосы