Таныш булыйк!

Урамда егылып тезен яисә беләген канаткан балаларга кечкенәдән ярдәмгә ашыккан Дания. Күрше-тирә кызны “тәмле телле, йомшак куллы фәрештә” дип йөрткән. 1982 елда Буа медицина училищесын тәмамлый һәм хезмәт юлын республика клиник хастаханәсенең хирургия бүлегендә башлый ул. Укыганда Мөслим егете Рәис белән таныша һәм 1989 елда Дания районыбызга килен булып төшә. 
1992 елдан бирле Дания апа УЗИ кабинеты шәфкать туташы булып эшли.
– Мөслимдә эшли башлавыма 32 ел вакыт үткән. УЗИ үтәргә бик күп кеше килә, нинди дә булса авыру ачыкланганнары борчыла. Күңелсезләнеп чыгып китүчеләрне күреп йөрәк өзгәләнә. Ярдәм итәсе, булышасы, хәлләрен җиңеләйтәсе килә. Ихластан әйтелгән җылы сүз кешегә өмете бирә, – ди Дания Сөләйманова.
Дания апа, өстәмә белем алып, хиджама да ясый башлаган. Медицина өлкәсендә белемен үстерү, һөнәре буенча яңалыклардан хәбәрдар булу максатында райондашыбыз медицина буенча бик күп газета-журналлар да алдыра.
Тырыш хезмәте өчен Дания Сөләйманова ТР Сәламәтлек саклау министрлыгының Мактау грамоталары, район башлыгының күпсанлы Рәхмәт хатлары белән бүләкләнгән.
 

Дания Сөләйманова./ Фото – Д.Сөләйманованың шәхси архивыннан.