Әйдә, бие, бие әле! Идәннәре селкенсен!

– Минем өчен бию ул – хисләрне чагылдыру билгесе. Кечкенәдән сыгылмалы гәүдәле кызларга, төз егетләргә соклана идем. Берәүләр биюгә зифа гәүдәгә кызыгып кереп китә, икенчеләрнең үзләрен таныта­сы килә. Минем өчен бию һәрвакыт яшәү мәгънәсе булды, – ди “Миз­гел” бию ансамбле җитәкчесе Ксе­ния Нәбиева.

Ксения Нәбиева биш яшеннән Чу­вашия республикасының Кызыл Ар­мия авылындагы “Яшьлек” халык бию ансамблендә шөгыльләнә һәм, хыялын тормышка ашырып, талант­лы биючегә әйләнә.

“Мизгел” бию ансамбленә нигез 2017 елда салынган. Ансамбльдә 12-14 яшьлек унөч егет һәм унөч кыз шөгыльләнә. Биш ел эчендә ан­самбль “Созвездие – Йолдызлык” эстрада сәнгатенең ачык республи­ка телевизион яшьләр фестивале, “Сандугач сайрар илем” балалар һәм яшүсмерләр иҗаты төбәк фестивале, “Безнең йорт – Татарстан” республи­ка этномәдәни фестивале, “Чулпан” халык хореография сәнгате фести­вале кебек чараларда катнашты һәм лауреат булды. 2018 елда ансамбль “Без бергә” республика халык иҗаты балалар сәнгате фестивалендә гран- прига ия булды. 2020 һәм 2021 еллар­да ансамбль “Созвездие – Йолдыз­лык” эстрада сәнгате фестиваленең гала-концертында катнашты һәм икенче-өченче дәрәҗә дипломнар­га лаек булды. Районда бер генә кон­церт, бер генә чара да “Мизгел” бию ансамбленнән башка узмый. 2021 ел нәтиҗәләре буенча ансамбльгә “Мөслим йолдызы” исеме бирелде.

Зифа Басыйрова исемендәге район мәдәният йорты каршын­да эшләүче “Түбәтәй” бию ансам­бле дә тамашачы мәхәббәтен яулап өлгерде. 2021 елда Ксения Нәбиева белән Ләйсән Исламова нигез салган ансамбль өлкән, кече һәм әзерлек төркемнәреннән тора. Өч төркемдә 5 яшьтән 10 яшькә кадәрге 65 бала шөгыльләнә.

– Ансамбльнең өлкән составы конкурсларда, фестивальләрдә, рай­он концертларында актив катнаша. 2022 елда төркем “Созвездие – Йол­дызлык” фестивалендә катнашты һәм хореография номинациясендә дебют өчен дипломга ия булды. “Түбәтәй” бию ансамбленең кече һәм әзерлек төркемнәре “Яшь бөреләр” район бәйгесендә беренче тапкыр катнашуларына карамастан, берен­че урынны яулады. Кечкенәләр безне энергия, уңышлары, яхшы чыгышла­ры белән рухландырып тора, – ди ан­самбль җитәкчесе Ләйсән Исламова.

2012 елда район мәдәният йор­ты каршында оешкан “Ык буйлары” халык җыр һәм бию ансамблен рай­ондашларыбыз аеруча үз итә. Бию һәм җыр сәнгате түгәрәкләрендә шөгыльләнгән яшьләрдән туплан­ган ансамбльнең җитәкчесе – ТР ат­казанган мәдәният хезмәткәре Ирек Салихҗанов.

Татар халкының җыр-биюләрен генә түгел, гореф-гадәтләрен саклау максатында оештырылган ансамбль репертуарындагы җыр-биюләр һәрвакыт актуаль.

– Районда гына түгел, республи­када узган бик күп мәдәни чаралар бизәге дә алар. Ансамбль “Безнең йорт – Татарстан”, “Безнең заман”, Әлфия Авзалова исемендәге халы­кара фестивальләрдә, “Әпипә” ха­лыкара бию фестивалендә дәрәҗәле урыннар яулады. Региональ сабан­туйларда, конкурсларда махсус ку­нак буларак та чыгыш ясыйлар. Кол­лектив күпкырлы иҗади программа­сы белән тамашачыга онытылмас­лык матур мизгелләр бүләк итә, – ди район мәдәният йортының сәнгать җитәкчесе Эльвира Гәрәева.

“Тукай бизәкләре” бию ансамбле, исеменнән үк күренгәнчә, Г.Тукай исемендәге Мөслим урта мәктәбе укучыларыннан тупланган. Ан­самбль 2018 елның сентябрендә оешкан. Җитәкчесе – Казан дәүләт мәдәният һәм сәнгать универси­тетын тәмамлаган Ольга Нурул­лина. Егерме егет һәм егерме кыз­дан торган ансамбль – районкүләм чараларның кабатланмас бизәге. Төрле дәрәҗәдәге конкурс- фестивальләрдә һәрдаим осталы­кларын чарлый торгач, җиңүләре дә аз түгел.

2019 елда “Без бергә” республикакүләм ха­лык иҗаты фестивалендә – беренче дәрәҗә лауре­ат, “Сандугач сайрар илем” фестивалендә икенче урын­ны алдылар. “Созвездие – Йолдызлык” фестивалендә матур уңышлары бар. 2020 елда – икенче урынны, быел, “Уникс” концертлар залында узган гала-концертта чыгыш ясап, өченче урынны яулады. 2021 елдан балалар Мөслим сәнгать мәктәбенең хореогра­фия бүлегендә шөгыльләнә. Халык һәм эстрада биюләренә өстенлек бирүче “Тукай бизәкләре” алга таба да сы­натмас, шәт.

“Мөслим йолдызчыкла­ры” бию ансамбле 2017 елда район мәдәният йорты ба­засында оеша. Ләйсән Ис­ламова җитәкчелегендәге ансамбльдә унбиш егет һәм унсигез кыз шөгыльләнә.

– Үз стиле булган йолдыз­чыклар тамашачы мәхәббәтен бик тиз яулады. Чыгышлары белән районкүләм чараларны бизиләр һәм төрле конкурс- фестивальләрдә дә уңышлары белән сөендерәләр. 2019 елда ансамбль, “Пирамида” күңел ачу үзәгендә “Созвездие – Йолдызлык” фестиваленең гала-концертында чыгыш ясап, махсус бүләккә лаек булды. Яңалыкка омтылучы “Мөслим йолдызчыклары” ансамбленә уңышлар насыйп булсын, – ди район мәдәният бүлеге җитәкчесе Илзир Ма­дьяров.

“Асса” бию төркеме Инди­ра Тимкина җитәкчелегендә 2017 елдан бирле эшли. Ан­самбль – Әлфия Авзалова исемендәге халыкара фести­валь лауреаты. “Сандугач сай­рар илем” төбәкара фестивале, “Без бергә” республикакүләм халык иҗаты фестивале, “Со­звездие – Йолдызлык” фе­стивале, “Каюлы читек” сю­жетлы биюләр фестивалендә күп тапкыр дәрәҗәле урын­нар алды ул. “Сәләт” проек­ты кысаларында уздырылу­чы Биләр форумында лауреат исеме белән бүләкләнде. Ин­дира Тимкина “Хәзинә” бию театрын да җитәкли. Ул 2021 елда оешкан. Бу ансамбльдә 44 бала бию сәнгате серләрен өйрәнә.

Булат Солтанов җитәкләгән “Очкыннар” бию ансамбле район сәнгать мәктәбе базасында эшли. Булатның кул астында 8-12 яшьлек 39 бала шөгыльләнә. Ансамбль – бик күп район кон­курслары җиңүчесе, “Моңлы Ык” фестивале дипломанты.

Бию көне төрле милләт вәкилләрен дуслаштыруны максат итеп куя. Бию теле мак­сатына ирешә кебек. Бу төр сәнгатьне үз итүчеләрнең ба­рысын берләштерә, бербөтен итә.

Лилия Шәймиева.

Фото – "Мөслим-информ" архивыннан.