Яз һәм хезмәт бәйрәме 

Май – бәйрәмнәргә һәм ялларга бай ай. Алар арасында 1 май бәйрәме аерым урын алып тора. Россиядә ул бүген Яз һәм Хезмәт бәйрәме буларак билгеләп үтелә. Район башлыгы Рамил Муллин райондашларыбызны бәйрәм белән тәбрикләде. Анда мондый юллар бар: “1 Май – илебез халкының бердәмлеген, татулыгын чагылдыручы күңелле һәм якты бәйрәм. Хезмәт һәммәбезне берләштерә, бер максатка тупланып, киләчәккә карап эшләргә өйрәтә. Районыбыз игенчеләре бәйрәмне елның-елында басуда – хезмәт фронтында каршылый, яңа уңышка нигез сала. Җиребезгә бәрәкәт иңсен, мул уңыш үстереп алырга язсын. Ил-көннәребезгә иминлек, йортларыбызга бәрәкәт, гаиләләребезгә бәхет телим!”