Суд залыннан. Яратырга аны ярамый!..

Данис аннан җиде яшькә кече! Ләкин гашыйк җаннарны бу гына туктата аламы соң?! Ләйсән эшкә бәйрәмгә барган төсле килә башлады – өс-баш ялт иткән, күз-керфек бу­ялган, иреннәрдә – җиләк исе аңкыган иннек... Тәмле хушбуй исләре та­ралган бүлмәгә кергәч, Данисның бермәлгә башы әйләнеп киткәндәй тоел­ды. Ләйсәнгә туры карау башта мәзәк кебек тоелса да, тора-бара бу күзләрдән башка сулый алмас дәрәҗәгә җитте Данис...

– Үз гамәлләре белән тормыш һәм сәламәтлек өчен куркыныч булмаган көч куллануын аңлап, Да­нис Мөбарәкшин Ришат Әскаровның башына һәм күкрәгенә суккан. Хөкем ителүче РФ Җинаятьләр кодексының 318 маддәсенең беренче өлешендә карал­ган җинаять кылуда үзен гаепле дип тапты һәм РФ Конституциясенең 51 маддәсе нигезендә күрсәтмә бирүдән баш тартты,– дип дәвам итте сүзен дәүләт гаепләүчесе.

Суд залының биек тәрәзәләреннән ургып кергән кояш нурлары Данисның йөрәген көйдергәндәй бул­ды, мең очкыннар белән телгәләде кебек. Кылган гамәленә тамчы да үкенми иде ул. Тик алай дисәң, аны рәшәткә артына да ябып ку­юлары бар! Аннан Ләйсәнне кем саклар? Кем кадерләп йөртер?! Ләйсән белән бер­нинди гөнаһ та кылмады ул. Әфләтун мәхәббәте иде алар арасында. Ике ара­да бернәрсә дә була алмага­нын алар икесе дә аңлыйлар, ләбаса! Юк, Ләйсән беркай­чан да балаларының язмы­шы белән уйнамаячак! Ярата ул Данисны, үлеп ярата. Үзе өчен утка да, суга да керергә әзер хезмәттәшенең көчле җилкәсе артында, аның җылы кочагында бәхетле яшәр иде дә бит!.. Тик соң оч­рашты шул алар! Артык соң!.. Арада булган яшь аермасы да сизелми югыйсә...

– Данис Мөбарәкшин 2021нче елның 3 апрелендә 17 сәгать 25 минутта Мөслим авылындагы кафеларның берсендә тоткарлана. Бу вакытта кафега Ләйсән Әскарованың ире килеп керә һәм тормыш иптәшенә суга, Ләйсәнгә начар сүзләр әйтә. Данис Мөбарәкшин, Ләйсән Әскарованы яклап, Ришат Әскаровка карата көч куллана. Соңгысы исә, хастаханәгә мөрәҗәгать итеп, сәламәтлегенә зыян килүе турында белешмә ала. Район эчке эшләр бүлеге ин­спекторы ир-егетләрнең ике­сен дә эчке эшләр бүлегенә алып килә һәм администра­тив беркетмә төзү өчен ка­бинетка алып керә. Кафега спиртлы эчемлекләр куллан­ган хәлдә килгән Р. Әскаров участок инспекторы каби­нетыннан чыгып китәргә тели һәм башы белән ишеккә бәрелә. Хастаханәдән алын­ган белешмәдә шушы төр тән җәрәхәтләре күрсәтелгән бу­луын да исәпкә алыгыз. Д. Мөбарәкшин гаепле түгел! Хөрмәтле хөкемдар, гадел карар кабул итүегезгә ыша­нам, – дип сүзен тәмамлады дәүләт гаепләүчесе.

...Ул көнне Ләйсән белән Данис, эштә уңышлы төзелгән килешүне котлап, кафега чәй эчәргә кергәннәр иде. Бер үк төрле ризык­ны яраткан хезмәттәшләр кинофильмнарның да бер үк жанрдагысына өстенлек бирәләр булып чыкты. Сөйләшеп сүзләре бетмәс төсле иде. Хезмәттәшләре Дания генә Ләйсәннең Да­нис белән дуслыгын өнәмәде. Алай гына түгел, көнләште, күрә алмады ул кызны! Менә Даниянең ни ире, ни баласы юк. Ә монда Ләйсәнгә ире дә баш ия, сөяркәсе дә мөкиббән киткән. Ләйсән белән дус булып йөргән Даниядә Ришатның телефон номе­ры бар иде. Ләйсән белән Данисның кафега китүләрен белгәч, ул Даниска: “Үшән булма, хатының кафеда күңел ача! Акылга утырт шуны!” – дигән смс-хәбәр юллады. Тор­мыш иптәшенең матурлы­гыннан гомер буе көнләшкән Ришатка шул җитә кал­ды! Күрсәтелгән адрес бу­енча очып диярлек барып җитте! Күзләренә ак-кара күренмәгән ирнең тормыш иптәшенең Данис белән генә түгел, ә башка хезмәттәшләре белән дә булуына игътибар итмәде. Ул Ләйсәнгә сук­ты. Кызларга кул күтәргән ирләрне “чүпрәк”кә санаган Данис Ришатка ничек сук­канын абайламый да калды. Ришатка шул гына кирәк! Ул бөгелеп төште дә, “уйнавын” дәвам итте.

– Үтерде!.. Күз алларым караңгыланды. Богау са­лыгыз кулына. Качмасын!.. – Шушы сүзләрне фәлән мәртәбә кабатлаган ирнең кыланышларына кафедагы­лар чиркану белән карады.

Полиция хезмәткәре ки­леп җитте. Унынчы модельле “Жигули”ена утырырга аза­планган егетне туктатып, хо­кук сакчысы Ришаттан ма­шина йөртү документларын сорады. Аягында көчкә ба­сып торган ир исерек ки­леш машина белән идарә иткәне өчен район эчке эшләр бүлегенә китерелде Хокук сакчысы бүлмәсендә беркетмә төзегән вакыт­та ишекне ачарга теләп, ка­чарга азапланганда бәрде ул башын. Ләкин Ришатның гаебен таныйсы килми. Үзенекен “сукалый”. “Башы­на хатынның сөяркәсе сук­ты” дигән фикергә ышанды­рырыга тели.

Суд утырышы төгәлләнә дигәндә, залга йөгерә- чаба Дания килеп керде. Кафеның күзәтү камерасын­нан алынган язманы Ришат юк итәргә кушса да, болай эшләргә Даниянең намусы кушмады. Ул дустын хаксыз­га рәнҗетүен дә, башкалар язмышы белән уйнавын да аңлады. Иң мөһиме – үз ха­тасын аңлады.

– Мондый очракларның булганы юк иде әле. Ләкин дөреслек, гаделлек бар ул! РФ Җинаятьләр кодексының 212 маддәсе 1 бүлеге нигезендә, җинаять вакыйгасы бул­мау сәбәпле, җинаять эшен һәм җинаять эзәрлекләвен туктатырга. Гаепләнүчене азат итәргә. Эш буенча мат­ди дәлил – видеоязманы җинаять эшендә сакларга...

Хөкемдарның авыр чүкече өстәлгә төшү белән Ләйсәннең ирен читенә ел­маю кунды. Даниска булган хисләр ташып, аның өчен борчылуның артта калуын белсә дә, аны кочакларга яра­мый! Яратырга аны ярамый...

Исемнәр үзгәртеп бирелде.

Лилия Шәймиева.

Фото - Pixabay.com