Хезмәт һәм тыл ветераны Кәримова Тихния Фатыйх кызы үзенең 90 яшьлек юбилеен билгеләп үтте

Еллар үтеп, чәчләренә көмеш кунса да, Тихния апа яшьлек сөйкемлелеген, җор телен югалтмаган. Үз яшен дә биреп булмаган райондашыбыз ак әбиләргә хас тыйнак, эчкерсез елмаю белән каршы алды безне.
– Хөрмәтле Тихния апа! Йөзегездәге елмаю алга таба да балкып торсын! Аллаһ биргән гомерегезне сәламәтлектә, якыннарыгыз янәшәсендә үткәрергә язсын! Аяз күк йөзе, бәхетле картлык, имин көннәр телибез сезгә! – диде Роберт Исламов, юбилярга район башлыгының котлау адресын тапшырып.

Бу көнне Тихния апа бик күп җылы теләкләр, бүләкләр кабул итеп алды. Район ветераннар советы рәисе Илгиз Низамов райондашыбызның иңенә шәлъяулык салды.

– 90 яшьне каршы алу - бик сирәкләргә генә бирелә торган бәхет. Сез үз аягыгызда йөгереп йөрисез, афәрин! Соклану катыш ак көнләшү белән карыйбыз сезгә. Алга таба да бүгенгедәй зирәк фикерле, аек акыллы булып калыгыз! Якыннарыгызга сез бик кирәк! Туган көнегез белән! – диде Тойгелде авыл җирлеге башлыгы Дамир Минһаҗев.

Лилия Шәймиева фотолары