Узган ел Татарстанда «Экология» милли проекты буенча 2,5 мең гектардан артык урман торгызылды.

Бу хакта ТР Урман хуҗалыгы министрының беренче урынбасары Илгизәр Зарипов сөйләде.

"2019 елда республикада 2514 гектар мәйданда урман торгызу эшләре башкарылды. Шул исәптән 1770 гектарда ясалма урман торгызу, 36 гектарда катнаш урман торгызу, 542 гектарда табигый урман торгызу һәм 166 гектарда урман үрчетү эшләре башкарылды», – дип хәбәр итте Илгизәр Зарипов.

Татарстан Республикасы Урман хуҗалыгы министрлыгы мәгълүматлары буенча, 2018 елда урманнарны чүп – чардан арындыру мәйданы 2598 гектар тәшкил итте.

2020 елда «Татарстан Республикасында урманнарны саклау» төбәк проектын тормышка ашыру өчен федераль бюджеттан 197,7 млн сум бүлеп бирелә, шул исәптән урман хуҗалыгы, урман янгыннары техникасы һәм җиһазлары сатып алуга – 46,4 млн сум каралган.

Бу акчаларга 4,8 мең га мәйданда урман торгызу һәм урман үрчетү буенча эшләр башкару, 11 тоннадан артык орлык әзерләү һәм 30 млн. нан артык үсенте үстерү планлаштырыла.