ТАСС генераль директоры Андрей Кондрашов «Татмедиа»да һәм «Татар-информ»да булды

ТАСС агентлыгы җитәкчесе шулай ук «Татар-информ» редакциясендә дә булды. Мәгълүмат агентлыгының баш мөхәррире Ринат Билалов аңа Татарстан гаммәви мәгълүмат чараларының эш юнәлешләре турында сөйләде.

Очрашуда шулай ук ТАСС агентлыгының стратегия буенча директоры Сергей Кузовников та катнашты.

Элегрәк ТР Рәисе Рөстәм Миңнеханов Андрей Кондрашов белән очрашкан иде. Алар Татарстан Республикасы белән ТАСС агентлыгы арасындагы хезмәттәшлекне алга таба үстерү перспективалары турында фикер алышты.

ТАСС - Россиянең алдынгы дәүләт мәгълүмат агентлыкларыннан берсе. Сентябрьдә ТАСС үзенең 122 еллыгын билгеләп үтәчәк. Мәгълүмат агентлыгы даими рәвештә илнең иң еш телгә алына торган гаммәви мәгълүмат чаралары рәтенә керә. ТАСС көн саен алты телдә 3 меңгә якын хәбәр, Россиядәге һәм чит илләрдәге үз хәбәрчеләре җибәргән меңгә якын фото- һәм видеоматериал урнаштыра, вакыйгаларның бербөтен һәм объектив картинасын формалаштыра. Узган ел нәтиҗәләре буенча мәгълүмат агентлыгы аудиториясе 147 миллион кулланучыдан артып киткән. ТАСС контенты Россиядә барлык социаль челтәрләрдә тәкъдим ителгән, агентлык аудиториясе аларда 4,4 миллион кулланучыга җиткән.

«Татар-информ» бүген ТАСС белән актив хезмәттәшлек итә, Россия һәм Татарстандагы мөһим вакыйгалар буенча мәгълүмат алмаша.

Фото: © «Татар-информ», Рамил Гали