Синең улларың, Мөслим! Диңгез кичкән Рим

Мирзаян белән Гөлхәндәмнең күәс төбе - төпчек уллары ул Рим. Шуңадырмы бала чакларында аны абый-апалары да, әти-әнисе дә яратып "кечкенә дә төш кенә" дип сөя торган булган. Мәктәпне бары яхшы билгеләренә генә тәмамлагач, Самара шәһәренә механиклар әзерләүче техникумга укырга китә ул. Техникумнан соң, аны армия сафларына алалар. Диңгез флотында өч ел хәрби бурычын үти Рим.

- Кайбер яшьләрнең бер еллык армия хезмәтенә өчен төрле сәбәпләр эзләвен аңламыйм. Ир-егет өчен армия мәктәбе кирәк. Тормышта үз юлымны табып, бүген ирешкән дәрәҗәләрем, әлбәттә, армиядә алган чыныгуларым, рухи ныклыгым нәтиҗәсе, - ди Рим Мирзаянович.

Озак еллар төп йортта яшәгәнгәме, туганнары һәрвакыт иң элек Рим белән киңәшләшә. Үзара ярдәмләшеп, бер-берсен хөрмәт итеп, туганлыкның кадерен белеп яши алар.

- Рим кечкенәдән бик ярдәмчел, сабыр, тыйнак булып үсте. Без абый-апалары читкә китеп беткәч, төп йортта әниебез белән Рим яшәп калды. Энебез, йорт салып, башка чыккач та әниебез төпчек улының гаиләсендә озак кына кунак булып кайта. Рим һәрвакыт үз тырышлыгы, үз хезмәте белән яшәде. Кайда гына эшләсә дә, хезмәттәшләре белән уртак тел таба. Кул астында эшләүчеләргә карата ихтирамлы, игътибарлы булганы өчен, аның үзен дә хөрмәт итәләр, - ди апасы Люция ханым.

Һөнәре буенча район ашлык кабул итү предприятиесендә инженер булып эшләргә дә туры килә аңа. Матбугат үзәгендә дә хезмәт куя. 2003 елда "НАСКО" ачык акционерлык җәмгыяте оешкан көннән бирле, район филиалының алыштыргысыз җитәкчесе Рим Хәбибуллин. Кечкенә генә коллектив булуына карамастан, "НАСКО" иминият компаниясе, күп райондашларыбызның ышанычын яулады. Районның иминият тармагында әйдәп бара. Хезмәтендә дә зур ихтирамга лаек җитәкче Рим Хәбибуллин.

- Рим Мирзаяновичның профессионал осталыгы һәм компетентлылыгы, клиентларга игътибарлы һәм ихтирамлы мөнәсәбәте филиал алдына куелган бурычларны уңышлы хәл итәргә мөмкинлек бирә. Ул коллективны хезмәт вазыйфаларын төгәл үтәүче көчле бер команда итеп туплады. Кыю карарлар кабул итәргә сәләтле. Башлаган эшен ахырына кадәр зур төгәллек белән башкара. Җәмгыять күләмендә оештырылган чараларда актив катнаша. Спорт яратуы, бәйгеләрдә җиңүе белән дә аерылып тора. Шуңа да җитәкчелек алдында абруй казанды ул, - ди "НАСКО" компаниясенең Яр Чаллы территориаль бүлеге җитәкчесе Тәнзилә Әхиярова.

Рим Хәбибуллин кул астында эшләүчеләр дә җитәкчеләре хакында бары тик мактау сүзләре генә әйттеләр:

- Рим Мирзаянович белән озак еллар бергә эшләү дәверендә аның беркайчан да тавыш күтәргәнен, кимсетүле яисә авыр сүз әйткәнен хәтерләмим. Ул - бик ярдәмчел, кайгыртучан җитәкче. Шатлыгыбыз булса бездән дә ныграк сөенә, борчуларыбызны да үзенекедәй кабул итә. Шул ук вакытта зур оештыру сәләтенә ия ул, - ди иминият компаниясенең Мөслим филиалы менеджеры Фиразия Шәймәрданова.

Гаиләсендә тормыш иптәше Резида ханым өчен - ышанычлы тормыш иптәше, өч кызы һәм бер улы өчен кадерле әти Рим Хәбибуллин. Кызлары Алсу һәм Айсылу, мәктәпне алтын медәльгә тәмамлап, бүген инде тормышта үзләре өчен кирәкле һөнәрләр алганнар, хезмәт биографияләрен башлап җибәргәннәр. Олы кызлары Алсу әти-әнисенә онык бүләк иткән.

- Рим белән 25 ел тату гомер кичерәбез. Ул бик ярдәмчел, гадел кешеләрне, аралашуны ярата. Шул ук вакытта бик тынгысыз, һәрвакыт хәрәкәттә ул. Мин аның кайбер холык-фигыльләрен әтиемә дә ошатам. Ә балалар өчен аның кебек ягымлы, йомшак әтиләр тагын бар микән? Әнине дә һәрвакыт кайгыртып, аның өчен борчылып яши. Тормышымны Рим белән бәйләвемә бер дә үкенмим, рәхмәт аңа булганы өчен, - ди хәләле Резида ханым.

Әнә шундый бар яктан да булган чын ир-егет ул шушы көннәрдә үзенең 50 яшьлек күркәм юбилеен билгеләп үтүче Рим Мирзаян улы Хәбибуллин. Узган еллар, чәчләренә ак-ак карлар сибеп, үз буразналарын салса да, Рим әфәнде әле дә яшьлек егәрлеген югалтмаган, замананың кырыс җилләре аның күңел матурлыгын какшатмаган. Киләчәктә дә тормышыгыз имин, гаилә күгегез һәрвакыт аяз булсын!

Фәридә Гайнетдинова.

Фото - Рим Мирзаяновның гаилә архивыннан.