Мөслим яшьләрне көтә

Бүген авыл хуҗалыгы тармагында яшь белгечләргә кытлык зур. Районда эшләүче агрофирмаларда, фермер хуҗалыкларында яшьләрнең җитмәве ачык сизелә. Заманча, энергия саклауга нигезләнгән техникада күпчелек урта һәм өлкән буын хезмәт куя. Күпчелек хуҗалыкларда агроном, инженер, механик кебек белгечләр дә – өлкән буын кешеләре.

Соңгы елларда яшь белгечләрне авыл хуҗалыгына эшкә тарту буенча төрле программалар кабул ителә. Агрофирмалар да эшкә кайткан яшь белгечләргә төрле ярдәм күрсәтә. Әмма яшьләрнең генә авылга кайтасылары килми кебек. Югыйсә бүген авыл хуҗалыгында да яшь белгечкә үсәргә, һөнәри осталыгын күрсәтергә мөмкинлекләр җитәрлек.

– Яшьләрне авылда калдыру һәм алга таба үсәргә мөмкинлекләр булдыру максатында, ТР Авыл хуҗалыгы һәм азык-төлек министрлыгы яшь белгечләргә дәүләт ярдәме проектын әзерләде. Республиканың агропромышленность предприятиеләренә эшкә урнашкан яшь белгечләргә бер тапкыр бирелүче 300 мең сум ярдәмне 750 мең сумга кадәр җиткерү турында күрсәтмә кабул ителде. Аны югары һәм урта һөнәри уку йортларын тәмамлап, авыл хуҗалыгы тармагына эшкә кайтучылар алырга хокуклы. Югары уку йортлары студентларына айлык стипендия күләме 2 мең сумнан – 5 мең сумга, урта һөнәри уку йортлары студентларына 1 мең сумнан 3 мең сумга кадәр арттырылды. Җитештерү практикасын узу чорында бирелүче стипендия күләме дә артты. Хәзер югары уку йортларының 3-5 курс студентлары 3000 сумга кадәр стипендия алачак. Авыл хуҗалыгына эшкә кайткан яшь белгечләр район авыл хуҗалыгы һәм азык-төлек идарәсенә килеп килешү төзергә бурычлы, – ди район авыл хуҗалыгы һәм азык-төлек идарәсенең кадрлар белән эшләү буенча консультанты Светлана Гәрәева.

Тулырак «Авыл утлары» газетасының 2025 ел өчен 14 март саныннан укыгыз.

Фәридә Гайнетдинова фотосы