"Кырмыскалык" тортын күпләр ярата, пешерүе дә бик җайлы, бисквитлары ничек пешәр, дип борчыласы юк. Үзем сынап караган "Кырмыскалык" торты рецептын тәкъдим итәм.
Камыр өчен: 200 г атланмай яки маргарин, 3 аш кашыгы шикәр комы, 3 аш кашыгы кибет каймагы, чама белән он.Крем өчен: 1 банка кайнатылган куертылган сөт (вареная сгущенка), 3 аш кашыгы кибет каймагы.
Эш тәртибе: майны эретергә, шикәр комы салып эрегәнче болгаткалап торырга. Бу масса суынгач, каймак һәм он салып, каты камыр басарга. Камырны 1-2 сәгатькә туңдыргычка куярга. Аннары камырны эре угычтан уарга һәм майланган табага салып, мичтә пешереп алырга.
Пешкән камыр суынгач, вакларга. Крем салып болгатырга, бик тыгызламыйча гына тәлинкәгә өяргә, өстен мәк орлыгы, какос вагы белән бизәргә.
Татлы "Кырмыскалык" әзер, чәйләрегез тәмле булсын!
Нет комментариев