«Китап» радиосында укылачак әдәби әсәрләрне сайларга халык үзе булышачак

«Китап» милли радиосында эфирда укылачак әдәби әсәрләрне  халыкка сайлау мөмкинлеге биреләчәк. Бу хакта «Татар-информ» хәбәрчесенә «Татмедиа» АҖ телевидение һәм радиотапшырулар департаменты җитәкчесе урынбасары, «Китап» радиосының баш мөхәррире Алмаз Миргаязов әйтте.

Төрле сораштыру үткәрергә була. Шунысына иманым камил: „Китап“ радиосында  кызыклы, актуаль әсәрләр яңгырарга тиеш. Анда бүгенге көн чынбарлыгына җавап биргән, газетта-журналларда чыккан кызыклы әсәрләр булырга мөмкин», — ди радио җитәкчесе.

Алмаз Миргаязов сүзләренчә, «Ак чәчәкләр» романыннан өзекләрне дә «Китап» радиосы өчен яраклаштырылган форматта җиткерергә була. «Ул бестселлер, кайчан укысаң да актуаль. Билгеле, тулы романны укып чыгу мөмкин түгел,чөнки радиода бер интонациядәге әйберне 3-5 минуттан да артык тыңлап булмый, кешенең физиологиясе аңа әзер түгел. Аннан музыкаль паузадан соң, шул ук әсәрнең тагын икенче өзегенә әйләнеп кайтырга мөмкин», — диде Алмаз Миргаязов.