Бүген, 27 август көнне, Казан Кремлендә ТР Рәисе Р.Н.Миңнеханов һәм аның тормыш иптәше Г.А.Миңнеханова исеменнән Татарстан Республикасының иң яхшы гаиләләре хөрмәтенә тантаналы кабул итү мәҗлесе узды.

Исламовлар гаиләсе - Мөслим районы горурлыгы. Алар ныклы гаилә генә түгел, ә эшкуарлык талантын актив хәйриячелек белән берләштереп, бик күпләргә терәк булдылар.

"Татарстанның атказанган авыл хуҗалыгы хезмәткәре" һәм "Россиянең мактаулы машина төзүчесе" исемнәренә лаек булган, "Фидакарь хезмәте өчен" һәм "РФ оборонасын ныгытуга керткән өлеше өчен" медальләре белән бүләкләнгән Илгиз Зәкиҗан улы Исламов гади инженердан алып "Агромастер" компаниясенә нигез салучыга кадәр гаҗәеп тормыш юлы үтте. Аның җитәкчелегендә предприятие Россия авыл хуҗалыгы машиналары төзелеше лидерларының берсенә әверелде.

Әмма Илгиз Зәкиҗан улының төп байлыгы - кешеләр. "Татарстан Республикасы алдындагы казанышлары өчен" ордены иясе беркайчан да ярдәмнән баш тартмый: пандемия вакытында хастаханә өчен җиһазлар сатып алды, ветераннарга, махсус хәрби операциядә катнашучыларга даими ярдәм итә. Күпьеллык хәйрия эшчәнлеге өчен ул берничә тапкыр "Ел хәйриячесе" исеменә лаек булды.

Кадрия Ягъфәр кызы - акыллы хуҗабикә. Ире белән бергә ул хәйрия акцияләре оештыра, мохтаҗ гаиләләргә ярдәм итә, районның социаль проектларында катнаша.

Аларның балалары Лилия һәм Ислам әтиләре белән бергә гаилә эшен дәвам итәләр. Оныклар туган якка мәхәббәт һәм гореф-гадәтләргә хөрмәт тирәлегендә үсә.

Исламовлар гаиләсе - үз иленә, туган җиреңә һәм кешеләргә тугры калып, уңышка ирешү үрнәге ул. Аларның тормышы - якташлары турында кайгыртып, халыкка хезмәт итүнең якты үрнәге ул.

Фото - Мөслим ГХАТ бүлеге архивыннан.