Бөгелмә шәһәрендә кара-каршы көрәш буенча V ачык республика фестивале үтте

Анда 9 команда составында 7-13 яшлек 120 спортчы катнашты. Безнең район данын "Десант" кикбоксинг мәктәбе спортчылары яклады. Күптән түгел генә шөгыльләнә башлауларына карамастан, тәҗрибәле спортчылар белән көрәштә алар үзләренең яхшы әзерлекле булуларын күрсәттеләр. Үз яшь категорияләрендә Фаиза Шәймурзина, Алмаз Әгъләмов - беренче, Рамис Фәсхиев икенче урынны яуладылар. Аларга Мактау грамоталары, медальләр һәм истәлек бүләкләре тапшырылды. Данис һәм Данил Рәхимовлар, Рафаил Шәйгәрданов та үзләренең техник яктан әзерлекле, өметле спортчылар булуларын күрсәттеләр. Кикбоксингчыларның тренеры Салават Исрафилов. Бәйгегә алып баруны оештырган өчен Фаит Шәймурзинга һәм Раушат Рәхимовка зур рәхмәтен җиткерә.