Үзебез дә балаларча сөенәбез

Марат Кашапов, "Яшелләндерү һәм төзекләндерү" җәмгыятенең директор урынбасары:

– Кыш бабай булып эшләү стажым – 15 ел. Беренче елларны, әле гаилә корганчы, хәллерәк күренү өчен, Кыш бабай костюмы эченнән куртка кия идем. Яшь барган саен гәүдә калынайды, соңга таба костюмны курткасыз гына кия башладым. Мин Кыш бабай буларак килеп, шигырь сөйләткән балаларның бүген күбесе – инде үзләре әти-әниләр. Күрешкәч: “И-и, Марат абый, син бит минем бала чагымны урладың. Син Кыш бабай булып килгәнче Яңа елга, Кыш бабайга ышана идем, сине таныгач, Кыш бабайның әкияти персонаж икәнен аңладым”, – диләр. Якын дусларга һәм танышларга Кыш бабай булып байтак йөрдек. Берничә ел рәттән район мәдәният йортында да Кыш бабай вазыйфаларын башкардым. Чыгыш ясаганда, шигырьләр ятларга да туры килде. Яңа ел төнендә Кыш бабай булып йөргән булмады. Ә менә 29 декабрьдә берничә ел дәвамында бер гаиләгә бардык, чөнки кызларының туган көне иде. Бәйрәм алдыннан балаларга шатлык, сөенеч өләшеп йөреп, үзебез дә шул сихри бәйрәм рухында яши идек.

Марат Кашаповның гаилә архивыннан.