Пилотсыз очкычлар куркынычы булганда мәктәпләрдә хәрәкәт планнары өйрәнелә

Район үзәгендә урнашкан мәктәпләрдә пилотсыз очкычлар куркынычы булганда укучылар, укытучылар, мәктәп хезмәткәрләренең хәрәкәтен оештыру буенча өйрәнүләр дәвам итә. Шундый өйрәнүләрнең чираттагысы Мөслим лицеенда узды. Дәрес барган вакытта билгеле бер кыңгырау тавышыннан соң укытучы укучыларга пилотсыз очкыч куркынычы булуын һәм укучыларга тиешле урынга качу хакында хәбәр җиткерде. Укучылар укытучы җитәкчелегендә класс бүлмәсеннән чыгып лиөейның качу урынына – подвалга ашыктылар. Подвалда утыру өчен урындыклар урнаштырылган, яктылык көйләнгән. Лицей директоры Чулпан Әхмәтшина һәм район башлыгы ярдәмчесе Наил Бәдретдинов укучыларга пилотсыз очкыч һөҗүме вакытында үтәлергә тиешле кагыйдәләр белән таныштырдылар. Мондый өйрәнүләр укучылар, хезмәткәрләр арасында пилотсыз очкычлар куркынычы вакытында югалып калмаска, дөрес адымнар ясарга ярдәм итә.

Фәридә Гайнетдинова фотолары