Мөслимдә бер ай эчендә светофорның кызыл утына чыгу сәбәпле өч юл-транспорт фаҗигасе теркәлде

Фаҗигаләрнең барысы да ашыгу аркасында килеп чыккан. Бу төр юл кагыйдәсен беренче тапкыр бозган өчен 1500 сум штраф каралган. Икенче тапкыр шушы ук кагыйдәне бозган өчен 5 мең сум штраф һәм 4-6 айга кадәр машина йөртү таныклыгыннан мәхрүм итү каралган. “Быел светофорның кызыл утына чыккан 7 шоферга административ беркетмәләр төзелде. Юлларның сыйфатын яхшырту, юл билгеләрен урнаштыру буенча җирлегебездә эш бара. Бүгенге көндә Мөслим авылында сигез урында: Җәмигъ мәчете янында, Яр Чаллы яклап керү юлында, Кооператив – Яшьләр, Колхоз – Банк, Колхоз – Бакча, Пушкин – Тукай урамнары чатларында светофорлар эшли. Тиздән барлык светофорларга да күзәтү камералары урнаштырылачак. Алар ярдәмендә хокук бозу очракларын тизрәк ачыкларга мөмкин булачак”, – дип хәбәр итә районның ДАИ җитәкчесе Феликс Мәгъданов.

Лилия Шәймиева фотосы.