610 мең сум акчасыннан колак каккан

Мөслимнән 1979 елгы хатын-кыз банк картасындагы 610 мең сум акчасыннан колак каккан. Мошенниклар райондашыбыз белән элемтәгә кереп, аның исәп-хисап счетыннан рөхсәтсез акча алу омтылышы турында хәбәр итә. Акчаны саклап калу өчен, аны куркыныч янамаган башка счетка күчерергә тәкъдим итәләр. Мошенникларга ышанып, телефонына килгән смс-кодларны хәбәр иткәннән соң, райондашыбыз банк картасындагы бөтен акчасын югалта. “Быел бу – 20нче мошенниклык очрагы. Мөслимлеләргә килгән гомуми зыян 4 миллион сумнан артып китте. Күпме генә язсак, аңлатсак та, кешеләр барыбер алдана. Шуны онытмагыз: сезнең акчагызны башка счетка күчерергә тәкъдим итеп шалтыратучылар – мошенниклар!” – ди район эчке эшләр бүлегенең җинаять эзләве бүлекчәсе җитәкчесе Булат Замалиев.

Фото – Татар-информ архивыннан