Сәет батыр токымнары

Ахыры. Башы газетаның 27 июнь, 4, 11, 18 июль саннарында.

– Ә-ә, әйе! Авызын йомарга да онытып әтисенең көрәшен күзәткән Булат та бар бит әле. Тиресен текмәгән, әнисен куандырып ул да егет булып килә. Төпчеген дә укытырга, һөнәрле итәргә кирәк. Әтисенең фатихасы белән көрәшкә кереп китеп, баш-аягы белән чумган егет, Тойгелде урта мәктәбен тәмамлагач, кая барырга дип, баш ватып тормады: Әлмәт физкультура һәм спорт техникумына укырга керде. Ул да Салават абыйлары кул астында көрәш серләренә өйрәнде. Иренмәде, ялкауланмады. Келәмгә беренче булып чыкты, көрәш залыннан иң ахырдан китте. Дәрт иткән – морадына җиткән, ди. Нәтиҗәдә ул спорт дөньясында әкияттәге Салсал батыр сыман “ай үсәсен көн үсте”. Баш әйләнерлек тизлек белән бер-бер артлы югары үрләр яулады. 75 килограммга кадәр авырлыктагы көрәшчеләр арасында 2004 елда Татарстан чемпионы булды. Россия беренчелегендә икенче урынга чыкты. Спорт мастеры исемен алды. Абыйсы укыган институтны тәмамлап, экономист дипломы алырга да өлгерде.

“Ике улымны да көрәшче итә алсам” дип хыялланган, аларның күңеленә яшьтән үк көрәш оеткысы сеңдергән әтиләре дә исән булса!.. Шатлыгыннан нишләргә белми, кош тоткан сабыйдай, үрле-кырлы сикерер иде, валлаһи! И-их!.. Энҗенең күңелен берара юксыну хисе телгәләп узды.

2005 елда, Казанның меңьеллык юбилее уңаеннан, башкалабызда билбау көрәше буенча дөнья чемпионаты узды. Анда планетаның 42 иленнән иң көчле көрәшчеләр җыелды. Төркиядән, Ираннан, Үзбәкстаннан, Кытайдан, Япониядән... Кыскасы, санап бетергесез! Хәтта тешләре белән күзләре генә елтырап торган, чуен кебек кап-кара тәнле Африка негрлары да килгән иде. Төшеңә керсә, куркып уянырсың. Беләк мускуллары да, ай-яй, хәтәр! Буар еландай уйнаклап тора. Шүрләп тә куярсың.

Җанатарлар арасында Булатның тренеры, дуслары, туганнары... Әнисе утыра! Җаваплылык бизмәнгә салып кына үлчәрлек түгел. Булат келәмгә чыкканда, алар сулышларын кысып, тын алырга да куркып утыралар. Өметләр акланырмы? Булат әлегә көндәшләрен бер-бер артлы җиңеп бара.

Фәтхулла Абдуллин

Тулырак «Авыл утлары» газетасының 2025 ел өчен 25 июль саныннан укыгыз.

Язманың башы: https://muslumirc.ru/news/dustym-kitap/saet-batyr-tokymnary-1753271118

Римма Афзалова фотосы