Мөслим делегациясе Болгар җыенында катнашты

Быелгы изге сәфәр күңелләрдә тирән эз калдырды. Меңләгән мөселман кардәшләр белән бер сафка басып тәүбә намазы уку, Идел буе Болгар дәүләтендә Ислам динен рәсми кабул итүгә багышланган тантаналы чарада катнашу һәркем өчен зур рухи вакыйга булды. Җыен барышында кунаклар җитәкчеләрнең тәбрикләүләрен тыңлады, тарихи һәм мәдәни мәйданчыкларда булды.

Катнашучылар мәчетләрне, музейларны, күргәзмәләрне карады, мастер-классларда катнашты. Изге Болгар җирендә кылынган догалар, җәмәгать белән укылган намазлар күңелләргә тынычлык өстәде. Ватан өчен башларын салган ата-бабаларыбыз рухына, ил-көнгә иминлек, мөселман өммәтенә бердәмлек сорап кылынган догалар һәркемнең күңеленә җылылык салды.

Мөслимнән килгән 50гә якын кешедән торган делегация җыен программасында каралган чараларның барысында да актив катнашты.

Сәфәрдә катнашучылар әлеге сәфәрне оештыруда ярдәм күрсәткән район хакимиятенә һәм Мөслим мөхтәсибәтенә ихлас рәхмәтләрен җиткерә.

Фотолар - Мөслим мөхтәсибәтеннән.