Мөфти Рушан Әббәсов: Авыруларга һәм бурычы булган кешеләргә хаҗ кылу мәҗбүри түгел

2026 елда хаҗ 25 һәм 26 майда узачак.

Әббәсов аңлатканча, хаҗ физик һәм матди мөмкинлекләре булган кешеләр өчен генә мәҗбүри. Авыруларга, шулай ук кирәкле акчасы булмаган яки тормыш кыенлыклары җайга салынмаган кешеләргә бу каршылыкларны юкка чыгарганчы сәфәрдән тыелырга кирәк.

Мөфти искәрткәнчә, Согуд Гарәбстаны билгеләгән рәсми квотадан тыш яки шикле каналлар аша хаҗга барырга ярамый, чөнки бу кануннарны боза һәм хаҗ кылуны куркыныч астына куя.

2026 елда Россия хаҗилары өчен квота 25 мең кеше тәшкил итә. 5 майдан 21 майга кадәр алар Согуд Гарәбстанына юл тотачак, ә 30 майдан 15 июньгә кадәр туган якларына әйләнеп кайтачак, дип хәбәр иткән иде элегрәк Транспорт министрлыгы.

Фото: © «Татар-информ», Салават Камалетдинов