Минем Рамазан

Ни өчен дисәгез, бу айда ураза тоту җәйге челлә вакытында әмер ителгән һәм аны “яндыручы эсселек” дип йөртә башлаганнар. Ә ураза гарәп телендә “саум” дип атала һәм “тыелып тору” дигәнне белдерә. Димәк, без бу айда ашау-эчүдән, начарлык эшләүдән, буш сүз сөйләшүдән тыелырга тиешбез.

Мин беләм, Рамазан ае – сабырлык, изгелекләр эшләү ае. Мәсәлән, әти-әнигә булышу, мәктәптә классташың теманы аңламаса – аңлату, мохтаҗларга ярдәм итү, авырулар фондына акча җибәрү һ.б. Мин санаган яхшылыклар әле бик аз. Ә чынлыкта, игелек эшлим дисәң, алар бик күптөрле. Ураза башлангач, әтием  төсле итеп бастырылган “Рамазан” таблицасын алып кайтты. Анда сул якта яхшы һәм бик тә кирәкле гамәлләр тезелеп киткән. Әнием миңа аны тутырып барырга киңәш итте. Мин анда кайсы көнне ниләр үтәгәнемне билгеләп барам. Рамазан аенда эшләргә кирәкле мондыйрак гамәлләр тезелеп киткән анда: ураза тоту, иртәнге зекерләр, үзең һәм туганнарың өчен дога, биш вакыт һәм өстәмә намазлар, талаш, гайбәт, исрафтан читләшү, туганнарың белән һәрвакыт элемтәдә булу, файдалы белемнәр алу, авырулар белән очрашу, яхшылыкка өндәп чакыру, сәдака бирү, ифтар үткәрү өчен үз өлешеңне кертү, начарлыклар кылган өчен тәүбә итү һ.б.

Мин уразаны 5 яшьтән тота башладым. Шул вакыттан башлап, башта – мәдрәсәгә, аннан мәчеткә Коръән укырга өйрәнергә йөри башладым. Ел саен ураза тоткан көннәремне арттырам. Иртән сәхәр ашарга мин бик авырлык белән торам, чөнки йокым нык килә. Әнием иркәләп, битемнән үбеп: “Җәннәткә керәсең киләме, улым?” – дип уята. Ә мин җәннәт турында Фәрит хәзрәт сөйләгән хәдисләрдән, әти-әнием сөйләгәннәрдән, интернеттан видеолар карап беләм. Минем анда бик эләгәсем килә. Шуңа әнием сүзләреннән соң сикереп торам. Гаиләбез белән сәхәр ашыйбыз, өйләдән соң ифтарга бергәләп тәмле ризыклар әзерлибез. Бергәләшеп Хәләл үзәккә берничә тапкыр ифтар ашына да бардык.

Мин бик сөенәм, чөнки минем белән бергә уразаны берничә сыйныфташым да тота. Аларның саны икенче елга артсын иде дип телим. Аллаһ безгә ураза тоткан өчен әҗер-савапны үзе бирә, хәтта аның саны да билгеле түгел.

Киләсе рамазанны да күрергә язсын безгә. Мин моны чын күңелемнән телим һәм көтәм.

Искәндәр Закиров. Мөслим.

Фото – нейрочелтәр