Мәгърифәт үзәге ишекләрен ачты

8 март көнне Татарстан мөфтие Камил хәзрәт Сәмигуллин Мөслимгә эшлекле сәфәр белән килде. Ул район башлыгы Альберт Хуҗин, имам-мөхтәсиб Илгиз хәзрәт Сөнгатуллин белән бергә Мөслимдәге бишенче мәчет – Ислам мәчете төзелеше белән танышты.

Аннары Татарстан мөселманнары башлыгы Җәмигъ мәчетендә “Вакыт комы” дип исемләнгән мәгърифәт үзәген ачу тантанасында катнашты. Илгиз хәзрәт кунакка һәм үзәкне ачуда зур ярдәм күрсәткән иганәче Илгиз Исламовка символик бүләк тапшырды. Үзәкне Мөнир хәзрәт Борһанов җитәкли. Илгиз хәзрәт аңа, туган якны өйрәнү музее директоры Нәзилә Бәдертдиновага, тәкъдимнәре, фикерләре, экспонатлар туплау белән ярдәм иткән Фоат Садриевка, Мөҗәһит Әхмәтҗановка рәхмәт сүзләрен җиткерде.

Музей экспозициясе рәвешендә, әмма заманча техника кулланып, интерактив форматта эшләнгән бүлмәдә бик кызыклы экспонатлар урын алган. Ишек төбендә бер сәгать ага торган ком сәгате урнаштырылган. Экспозиция белән танышу өчен кимендә шулкадәр вакыт кирәк. Кергәндә дә, чыкканда да күзгә ташлана торган ком сәгате адәм баласына вакытның туктаусыз агуын, гомернең дә шулай тиз узуын, аны кире кайтарып булмавын, шуңа күрә аны игелекле эшләр белән тутырырга кирәклеген искәртеп тора кебек. Экспозициядә төрле чүлләрдән алып кайтылган ком (алар төрле төстә булулары белән кызыклы), Мәккәдән үк кайткан таш, Мөхәммәт пәйгамбәр (с.г.в.), аның сәхабәләре, Болгар чорында ислам диненең килеп керүе турында мәгълүмат, безнең якларда мөселман ир-ат һәм хатын-кызлар кигән өс киемнәре, түбәтәй-калфаклар, тәһарәт өчен кулланылган көнкүреш предметлары, чигүле сөлгеләр, борынгы китаплар бар. Коръән китапларына биредә аерым игътибар бирелгән. Аның төрле форматтагысы тәкъдим ителә. Биредә урнаштырылган үзуйнаткычтагы пластинкадан Коръән аятьләрен тыңларга була. Дисклар, кассеталар коллекциясе дә булдырылган. 

Тулырак «Авыл утлары» газетасының 2025 ел 14 март санында укыгыз

Гөлназ Җәлилова фотолары