Бу көнне Мөслимдә

15 июнь

Гамьсезлеккә чик куелсын

Билгеле булганча, агымдагы ел уңышын югалтуларсыз ташу максатында автомобиль юллары төзү һәм ремонтлау буенча икеайлык игълан ителгән иде. Бу юнәлештә халык депутатларының район Советы башкарма комитеты тарафыннан киңкырлы хәзерлек эшләре күрелде, хуҗалыкларга һәм оешмаларга конкрет заданиеләр җиткерелде. Әйтергә кирәк, күпләр бу мөһим эшкә зур җаваплылык белән кереште. “Урожай”, “Правда”, “Алга”, М. Горький исемендәге колхозлар, “Трудовик” тәҗрибә-җитештерү хуҗалыгы эшне әнә шулай башлап җибәрделәр. Нәтиҗәдә юлларны төзекләндерү уңышлы дәвам итә. “Нектар” совхозына баручы юлның аеруча начар булуын искә алып, аны ремонтлауга РАПОның ремонт-техника предприятиесе беркетелгән иде. Коллектив эшне тиз һәм сыйфатлы башкара.

И.Мөбәракова.

Осталарның остасы

Ул көнне Калинин исемендәге колхоз җәйләвендә иртәдән үк гадәти булмаган җанлылык иде. Биредә колхоз-совхозлардан машина белән саву операторлары осталыкта, җитезлектә сыналу өчен җыелды. Өстәл янында Куйбышев исемендәге колхоз данын якларга килгән Зәнфирә Харисова. “Татарстан” колхозыннан килгән Илсөяр Габдуллина да дулкынлануын яшерми. Киров исемендәге колхозның яшь савымчысы Илсөяр Шәфигуллина конкурста 1985 елдан бирле катнаша. Конкурсның җиңүчеләре “Трудовик” тәҗрибә-җитештерү хуҗалыгыннан В. Фәрхетдинова һәм “Михайловка” совхозы савымчысы Т. Евдокимова. Алар тиздән Тукай районында узачак республика ярышларында катнашачак.

Ә.Ногманова, махсус хәбәрчебез

Фото – Мөслим-информ архивыннан