Көзге мәрхәмәтлелек ярминкәсе узды

“Көзге мәрхәмәтлелек ярминкәсе” дип исемләнгән чара лицей ишегалдында оештырылды.

Биредә һәр сыйныф укучылары төрле тәм-томнар пешереп алып килгәннәр, көзге уңыштан мул кәрҗиннәр тутырганнар. Мәктәп ихатасы бер мәлдә олы бер ярминкә мәйданын хәтерләтте. Мул өстәлләр әзерләү өчен укучыларга әти-әниләре зур ярдәм күрсәткәннәр.

Әти-әниләр сатучылар булсалар, укучылар һәм укытучылар сатып алучылар булдылар. Ярминкә мәйданын мөслимлеләр дә үз итте. Күпләр төрле кайнатмалар, яшелчәләр алдылар. Ярминкәдән кергән ярдәм махсус хәрби операциядәге егетләргә һәм аларның гаиләләренә ярдәм итү өчен кулланылачак.

Ярминкә укучыларның чыгышлары белән үрелеп барды. Лицей директоры Чулпан Әхмәтшина барлык укучыларга, әти-әниләргә рәхмәт сүзләрен җиткерде һәм бәйрәм белән тәбрикләде. Лицейлылар агымдагы елда Россия "Белем" җәмгыяте һәм РФ Мәгариф министрлыгының грантына ия булдылар. Әлеге ярминкә дә шушы грант кысаларында үткәрелде.

 Фәридә Гайнетдинова репортажы.
#Мөслим_мәгарифе