«Макс» гражданнар өчен тулы канлы мультиплатформага әйләнде

ТР Цифрлы үсеш министры урынбасары Алексей Клонцак матбугат конференциясендә «Макс» мессенджеры экосистемасын үстерү һәм республика халкы өчен булдырылган цифрлы сервислар турында сөйләде.

Бүген «Макс» гражданнар өчен тулы канлы мультиплатформага әйләнде. Биредә яшәүчеләр якыннары, дуслары һәм хезмәттәшләре белән аралашып кына калмый, көндәлек мәсьәләләрне дә хәл итә. Татарстанда гавами каналларга язылучыларның гомуми саны 1,2 млн кешегә җитте, шул ук вакытта республикада яшәүче 650 меңнән артык кеше ай саен яңалыклар контентын укый. 

Кулланучыларның куркынычсызлыгын гамәлгә кертелгән антифрод-технологияләр тәэмин итә, шул исәптән ике факторлы аутентификация һәм «гаилә яклавы» функциясе: ул балаларны, әби-бабайларны мошенниклардан һәм спамнан сакларга ярдәм итә. Мессенджерда шулай ук «куркынычсыз режим» функциясен көйләргә мөмкин, ул сезнең контактлар исемлегендә булмаган кулланучылардан шалтыратуларны һәм чатларга чакыруларны тыя.

Татарстанда яшәүчеләргә уңайлы сервислар бар, алар бер-ике кат басып теләсә нинди хезмәтне алырга ярдәм итәчәк. 2026 елның гыйнварыннан мессенджерда «Татарстан Республикасы Дәүләт хезмәтләре» мини-кушымтасы аудиториясе 40% ка үсте. Чат-бот аша торак-коммуналь хуҗалык счетчиклары күрсәткечләрен тапшырырга, салымнар, штрафлар һәм дәүләт пошлиналарын түләргә, «Халык контроле» нә мөрәҗәгать җибәрергә мөмкин. Биредә барлыгы 180 хезмәт күрсәтелә, шул исәптән күптән түгел эшли башлаган Казан аэропорты авиарейсларын күзәтү функциясен дә. 

Искәртик, «Макс» мессенджерында уңайлы җиһазларны үстерү «Мәгълүматлар икътисады» илкүләм проектының төп бурычларына җавап бирә. Аның төп максаты — халык өчен аңлаешлы һәм уңайлы цифрлы сервислар булдыру.

Фото: ИА "Татар-информ"