Тиз кулдан коймак

Иртәнге чәйгә табада чыжлап пешкән коймактан да тәмлесе юктыр ул. Хуҗабикәләр аның ниндиләрен генә пешерми: челтәрләнеп торганын да, калынын да, юкасын да... 

Кирәкле ингредиентлар: 0,5 литр сөт, тоз, шикәр комы, ике йомырка, лимон кислотасы, чәй содасы, он.

Әзерләү тәртибе: сөткә бер чәй калагы (өймичә генә) тоз һәм ике аш калагы шикәр комы, өч стакан он салып болгатабыз. Онны чамалап салырга кирәк, камыр куе булырга тиеш. Ул арада ярты стакан кайнар суга бер чәй калагы лимон кислотасы салып болгатабыз да аны камыр өстенә салабыз. Янәдән яхшылап болгатабыз. Ике йомырка сытып салабыз, кабаттан болгатабыз. Ике аш калагы кайнар суда бер чәй калагы соданы сүндерәбез дә камырга өстәп болгатабыз. Камыр әзер. Майлы табада ике ягы да алтынсу төскә кергәнче кыздырасы гына калды.

Тәмле булсын!