ТӘМЛЕТАМАК. ТЕЛЕҢНЕ ЙОТАРЛЫК “ТОРБА”
Хәзер кеше табигатькә ял итәргә чыкса да, берәр эш белән кузгалса да, кыр шартларында җиңел генә әзерләнә торган ризык пешерү ягын карый. Шашлык көндәлек ризыкка әйләнеп бара, аның белән беркемне дә шаккаттырып булмый. Кулланышка “торба” дигән ризык килеп керде. Үрәзмәт авылында яшәүче Шакировлар аны гадәттә чират буенча көтүгә чыкканда пешерәләр икән. Алсу Шакирова “торба” әзерләү серләре белән уртаклаша.
– Бу ризыкны, кыр шартларында гына түгел, ишегалдында да пешереп була. Аның өчен җиргә горизонталь урнаштыру өчен махсус эшләнгән торба кирәк. Диаметры чама белән – 45 см, озынлыгы 70-80 см тирәсе. Бер башы герметик итеп капланган торбаның икенче башына тыгыз ябылучы тоткалы капкач эшләнә, “аяк” ларны торбага беркетеп тә, аерым да эшләргә була. Торба эченә урнаштырырлык итеп, тутыкмый торган калайдан тоткалы шакмаклы савыт эшләнә. Элек шприцлар стерильләштерү өчен файдаланылган савытны файдаланырга да була.
Инде ризыкның үзенә килгәндә, савыт төбенә зур булмаган кисәкләргә туралган маринадланган ит (сарык, куян, тавык, сыер ите дә бара) салына. Ит өстенә помидор (күбрәк булса, тәмле), эре итеп туралган чистартылган бәрәңге, туралган кәбестә тезәсең. Өстенә тоз һәм борыч сибәргә, сарымсак, яшел тәмләткечләр салырга да, ингредиентларны тыгызлап, өстенә кәбестә яфраклары капларга, 1 стакан су салып, капкачын ябып куярга. Савытның капкачы ачылып китмәсен өчен, алюмин чыбык белән бәйләргә дә була. Шуны торба эченә урнаштырасың. Савыт астына зур булмаган алмагач ботагы куеп калдырсаң, ыс исе ризыкка сеңеп, тәмле булып пешә. Соңыннан, ялкыны торба астына тигез таралырлык итеп, учак ягасың. Бер сәгать дигәндә “торба” әзер дә була.
Фото-Pixabay.com
Следите за самым важным и интересным в Telegram-каналеТатмедиа
Безнең телеграм каналга кушылыгыз! Телеграм-канал
Нет комментариев