Шәфкать ияләре бәйрәме

Бәйрәмдә хастаханәнең тари­хы, бүгенгесе турындагы видео­ролик күрсәтелде. 1930 елда рай­он үзәгендә 50 урынлы хастаханә төзелә. Рус Шуган авылыннан күчереп салынган бер катлы ФАП әкренләп авыруларны кабул итә башлый.

1962 елда Ильяс Хәбибуллин баш табиб итеп билгеләнә. Шул чор­да ике катлы хастаханә сафка баса. Хастаханәдә табиблар һәм кабинет­лар саны елдан-ел күбәя бара.

– Хастаханәнең балалар бүлегендә 15 медицина хезмәткәре ярдәм күрсәтә. Бүлекне Алия Зәйдуллина җитәкли. Али Агабеков җитәкләүче хирургия бүлегендә 24 койка исәпләнә. Биредә табиб-хирург, си­гез шәфкать туташы һәм биш техник хезмәткәр эшли. Бүлектә елдан-ел катлаулырак операцияләр башкары­ла. Хастаханәнең терапия бүлеге 26 койкага исәпләнгән. Бүлек мөдире Камил Хәлиуллин кул астында 14 медицина хезмәткәре эшли. Сигез хезмәткәрдән торган физиотерапия бүлегендә башка районнарда сирәк ясалучы физиопроцедуралар да зур үсеш алды, – ди баш табиб Дамир Сөләйманов, хастаханә эшчәнлеге белән таныштырып.

Поликлиника җиде уча­стокка бүленгән. Участоклар эшчәнлегеннән тыш офтальмология, гинекология, йогышлы авырулар, не­врология, психиатрия, наркология, кардиология, урология, дерматоло­гия кабинетлары эшли. Балалар по­ликлиникасында биш участок педи­атры, балалар неврологы һәм җиде шәфкать туташы хезмәт күрсәтә.

Функциональ диагностика бүлегендә ультратавыш ярдәмендә тикшерү, эхокардиография, электро­энцефалография, фиброгастроду­аденоскопия белән фиброколоно­скопия кабинетлары эшли. Иртә ди­агностикада әлеге кабинетларның ярдәме зур.

– 2022 елда вируслы пневмония белән 1183 кеше исәпкә алынды, шуларның 302нә ковид диагнозы ку­елды. Коронавирусны ачыклауда һәм дәвалауда инфекционист Рәшит Ва­гыйзов һәм шәфкать туташы Гөлнар Кәримова фидакарь хезмәт куйды, – ди баш табиб.

– Мөслим хастаханәсендә эшләүче һәр хезмәткәр зур хөрмәткә лаек. Капиталь ремонт узган хастаханәдә дәвалану өчен бар­лык уңайлыклар да тудырылган. Медицина хезмәткәрләре үз эшен намус белән, күңел биреп башка­ра. Район халкына һәм медицина хезмәткәрләренә сәламәтлек, күңел тынычлыгы һәм озын гомер телим, – диде район башлыгы урынбасары Азат Әхмәтҗанов.

Район үзешчәннәре чыгышлары белән үрелеп барган чарага “Кояш­кай” нәниләре үз өлешен кертте. Та­библар булып киенгән кечкенәләр залдагы медицина ветераннарына ак чәчәкләр бүләк итте.

Тантанада район хастаханәсе ирешкән уңышлар, хастаханәгә, поликлиникага кайткан яңа җиһазлар турында да мәгълүмат җиткерелде. Бертөркем медицина хезмәткәрләренә РФ, ТР сәламәтлек саклау министрлыкларының, район башлыгының, район үзәк хастаханәсе һәм профсоюз оешмасының Мактау грамоталары, Рәхмәт хатлары тап­шырылды.