Шагыйрә, җырлар авторы, режиссер Нәфисә Сабирҗанова вафат

Әлмәттә яшәүче шагыйрә, тележурналист, режиссер, сценарист Нәфисә Сабирҗанова вафат. Бу хакта Әлмәт районы администрациясендә хәбәр итәләр.

Нәфисә Сабирҗанова гомерен татар мәдәниятен үстерүгә, туган телне һәм халык традицияләрен саклауга багышлады. Ул тарихка, мәдәнияткә һәм төбәкнең танылган кешеләренә багышланган «Җомга» тапшыруының авторы иде.

Аның музыкага салынган шигырьләре танылган башкаручылар репертуарына кереп, тыңлаучылар арасында киң танылу алды.

Хакимиятләр Нәфисә Сабирҗанованың туганнары һәм якыннарының кайгысын уртаклаша, аның турындагы истәлек хезмәттәшләре, дуслары һәм иҗатын хөрмәт итүчеләрнең йөрәкләрендә сакланачагын ассызыклый.

Нәфисә Сабирҗанова — шагыйрә, тележурналист, популяр җырлар авторы, Татарстанның атказанган мәдәният хезмәткәре, Рафаил Төхфәтуллин һәм Саҗидә Сөләймәнова исемендәге премияләр лауреаты, Россиянең һәм Татарстанның журналистлар, Татарстанның Язучылар берлекләре әгъзасы иде.

Фото: Татар-информ