Районда чәчү башланды

Районыбызда язгы чәчү кампаниясенә старт бирелде. Беренчеләрдән булып чәчүгә быел да “Туган як” агрофирмасы кереште. Бүген агрофирма горчица чәчә башлады. Әлеге культура агрофирма буенча 600 гектар мәйданда чәчеләчәк. Чәчү эше быел гына кайткан Солитер чәчү агрегаты белән башкарыла. Әлеге чәчкечнең киңлеге 12 метр тәшкил итә. Туган яклылар горчица чәчүне ике көндә тәмамларга ниятли. Шушы көннәрдә алар арпа культурасын чәчүгә дә керешәчәк. Әлеге культура агрофирма буенча 4000 якын мәйданда игеләчәк.