Мәхәббәткә киртә юк
Райондашларыбыз Илгизә һәм Расыйл Садртдиновларның кызыл туйлары үзенчәлекле шартларда узды. Үзизоляция режимы вакытында өйләнешкән яшь пар беренче уртак бәйрәмнәрен икесе генә билгеләп үтте.
– Туй көнен билгеләгәндә илдә пандемия юк иде әле. Без инде аны зурлап, ике якның да әти- әниләрен, туганнарын җыеп үткәрербез дип планнар кордык, кафены сайлап, туйга чакыру открыткалары таратырга уйладык. Районның ЗАГС бүлегенә гаризаны 26 февральдә тапшырып, туй көнен 17 апрельгә билгеләгән идек. Ләкин барысы да без уйлаганча килеп чыкмады. Үзизоляция игълан ителгәч, билгеләнгән датаны үзгәртәсе килмәде, сөйгәнем белән ЗАГСта язылышу белән генә чикләндек, – ди Илгизә.
Садртдиновлар гаиләсе бүгенге көндә Яр Чаллы шәһәрендә яши. Бер-берсен яратып, хөрмәт итеп торганнары әллә кайдан күренеп тора. Яшьләрнең телендә – “матурым”, “җаным” сүзләре генә. Татлы мәхәббәтләре аларны гомер буена озата барсын иде.
– Мәхәббәткә бернәрсә дә киртә була алмый. Хәтта ил буенча игълан ителгән коронавирус та. Бик бәхетле пар без! Алла боерса, гаиләбезне тулыландырып, балаларыбыз да туар. Иң мөһиме – гаиләдә татулык, үзара аңлашу булсын, – ди Расыйл.
Зур тормыш юлына беренче адымнарын атлаган яшьләргә гомер дәвамына җитәрлек наз һәм мәхәббәт, озын, тату гаилә юлы телибез!
Лилия Шәймиева.
Марат Баһауов фотосы.
Следите за самым важным и интересным в Telegram-каналеТатмедиа
Безнең телеграм каналга кушылыгыз! Телеграм-канал
Нет комментариев