Кечкенәдән сайлаган һөнәр

– “Төзекләндерү һәм яшелләндерү” унитар предприятиесендә Валентин абый – кадерле кадр. 51 яшьтә булса да, яшьләрчә җитезлеге, тырышлыгы, төгәллеге белән күпләргә үрнәк. Яшь буын нәкъ менә шушындый эшсөярләр кулы астында хезмәтнең тәмен белеп үсәргә тиеш, – ди предприятие җитәкчесе Радик Шәйсолтанов. 
Иван абый белән Раиса апа гаиләсендә дүртенче – төпчек бала булып дөньяга килгән Валентин кечкенәдән техникага һәвәс була. Мәктәптә укыганда ук комбайнчы ярдәмчесе булып эшли, аннан үзе дә комбайн штурвалы артына утыра. Район һөнәри училищесында тракторчы-машинист һөнәрен үзләштергәч, Венгриядә хәрби хезмәт уза. Хезмәт юлын ул туган авылында XXII партсъезд исемендәге колхозда тракторчы булып башлый. 
– Авыл кешесе элек-электән гади һөнәр сайлады. Механизаторларның элек артык кадере булмаса да, хәзер җир, хезмәт кешесенең кадере бар. Әнием гомер буе колхозда атлар карады. Мин кечкенәдән үк зур техникага утырып йөрергә хыялландым. Эшемә яратып барам, күңелемне биреп эшлим. Күңел яткан эш булгач, эшләве дә рәхәт, яшәве дә! – ди Валентин абый. 
Бүгенге көндә Валентин абый авыл юлларының профилен торгызу белән мәшгуль. “Кояшлы Ык” ял паркында башкарылган җир эшләрендә дә башлап йөргән ул. 
– Без Валентин белән кечкенәдән бергә – авылдашлар да, сыйныфташлар да. Укыган вакытта ук аның ипле, ярдәмчел, гади һәм гадел булуына игътибар иттем. Беренче булып ярдәмгә ашыгу, көчсезләрне яклау – аңа тумыштан бирелгән сыйфатлар. Мәктәптән соң да аралашуыбыз өзелмәде. Хәрби хезмәттән кайткач, өч ел очрашып йөрдек тә гаилә кордык, ике ул үстердек, – ди тормыш иптәше Вероника апа. 
Район поликлиникасының процедура бүлмәсендә шәфкать туташы булып эшләүче Вероника апа тормыш иптәшенә терәк булып яши. Тату, матур гаилә Романовлар, бер-берсен хөрмәтләп яшиләр. Эштән дә, яшәүдән дә тәм һәм ямь табып гомер кичерә әлеге гаилә.

Лилия Шәймиева.

Фото – "Мөслим-информ" архивыннан.