Имин тормыш – зур бәхет ул!

– Җиңү көне быел үзенчәлеклерәк уза. Шулай да минем өчен бәйрәм рухы май башыннан ук сизелә башла­ды. Райондашларыбыз, мәктәп укучылары, килеп, шалтыра­тып, котлыйлар, теләкләрен җиткерәләр. Ходай гомер бирсә, медальләремне тагып, киләчәктә бәйрәмне тамаша кылырга өметем юк түгел, – ди Мансур Зиннуров.

Ветеран укучыларның үзләре ясаган бүләкләрен бик яратып кабул итте. Өчпочмаклы хатны күргәч, күзләренә яшь тулды. Сугыш елларының бөтен мәхшәрен күз алдыннан үткәрде булса кирәк...

– Исән калуым белән су­гышчан дустым Хәдимуллага рәхмәтлемен. Аны үлгәнче онытмам. Ул булмаса, якты дөньяны күрү насыйп булмас иде, мөгаен... Ходай сугышлар­дан, афәтләрдән сакласын! Иле­без тыныч, күкләребез аяз бул­сын! – ди Мансур абый.

Гадилеге белән зыялы район­дашыбыз беркайчан да масаюны белмәде. Һәркем белән үз итеп аралаша, истәлекләре белән уртаклаша ул. Шуңадырмы, һәрберебез өчен кадерле.

Лицей директоры Лилия Хәбибуллина, мәктәпнең тор­мыш иминлеге нигезләре фәне укытучысы Таһир Хатбуллин ветеранга җылы теләкләрен җиткерделәр.

Ветераннар сафы елдан-ел сирәгәя, исән булганнарының да сәламәтлекләре чамалы. Бәйрәм алдыннан район Баш­карма комитеты җитәкчесенең социаль-мәдәни мәсьәләләр буенча урынбасары Мари­на Бәдретдинова волонтерлар белән берлектә ветераннарга бәйрәм күчтәнәчләре таратты.

– Җитәкчеләргә , хөкүмәтебезгә зур рәхмәт! Ел да олылыйлар. Җиңү бәйрәме саен 75 ел элек илебезгә тыныч­лык китергән Җиңү таңы искә төшә. Имин тормышта яшәү – зур бәхет ул, – ди Мөслимдә яшәүче Бөек Ватан сугышы ветераны Хәертдин Мөхәммәтов.

9 май – Җиңү көнендә рай­он җитәкчелеге “Сугышчан һәм хезмәт даны” мемориаль ком­плексында илебез азатлыгы өчен көрәшкән райондашлары­быз истәлегенә чәчәкләр салды.