Игелекле булыйк

26 гыйнвар көнне Метрәй авылы мәдәният йортында “Изгелеккә бер адым!” дип исемләнгән хәйрия концерты узды Әлеге концерт нәни райондашыбыз Регина Аптеевага ярдәм күрсәтү максатында оештырылды. Концертта тамашачыларга Метрәй авылы үзешчәннәре тарафыннан  видеосюжетлар, шигырьләр һәм җыр-биюләр тәкъдим ителде. Чарада шулай ук, Регинаның әти-әнисе Резеда һәм Ринат Аптеевлар һәм аларның туганнары да катнашты. Хәйрия урнасына җыелган акча концерт ахырында Аптеевларга тапшырылды. Шушы ук концерт белән метрәйлеләр 30 гыйнвар көнне Мәлләтамак авылы мәдәният йортында чыгыш ясаячак. Киләчәктә метрәйлеләр якын-тирә башка авылларда гына түгел, ә шәһәрләрдә дә чыгыш ясарга җыеналар. Әлеге хәйрия концертында катнашырга күрше авыллардан гына түгел, шәһәрләрдән кайтучылар да теләк белдерәләр. Алар алга таба концертларын Яр Чаллы һәм Казан шәһәрләрендә дә куярга ниятлиләр.