Иделдән Эльбага кадәр

Әтисе Сәхипгәрәй, әнисе Шәмсетәлига гади колхозчылар була. Иртә таңнан кара төнгә кадәр бил бөгәләр, ә гаиләдә бер-бер артлы туган җиде җан аларны көтеп тора. Гыйндуллага мәктәптә озак укырга туры килми. 4 класстан соң ук колхозга эшкә чыга. 20 яшьлек егет 1940 елда армиягә алына. Хәрби хезмәтне Пермь өлкәсендә миномет полкында наводчик булып үтә. Гыйндулла анда сержант дәрәҗәсен ала.
Бөек Ватан сугышында Беренче Украина фронтының өченче артиллерия дивизиясе 186 миномет полкы составында дошманга каршы сугыша. Алар сугышчан дуслары белән дошманга снарядлар яудыралар, фашистларның стратегик объектларын шартлаталар, дошман оборонасын өзәләр.
Гыйндулла Сәхипов Курск дугасындагы каты бәрелешләрдә, Польша, Чехия, Германия шәһәрләрен азат итүдә дә катнаша. Аның катлаулы сугыш юлы Иделдән алып Эльба елгасына кадәр сузыла.
Илгә җиңү алып кайткан солдат бик матур гаилә кора. Бүген аның янында гомерлек юлдашы, кайгыртучан һәм бер минут та тик тормый торган Нәҗибәсе бар. Гыйндулла абый белән Нәҗибә апаның хәлләрен белергә атна саен Яр Чаллы каласыннан балалары кайта.
Олы кызлары Наилә – табибә, уртанчы улы Әгълә – судья, кече кызлары Зәйлә – балалар бакчасында тәрбияче. Алма агачыннан ерак төшми, диләр. Бу гаиләнең балалары да бик уңганнар, тәрбияле һәм инсафлы, олыны – олы, кечене кече итәләр, һәрвакыт ярдәм кулы сузарга әзер алар. Сәхиповларның ихата-каралтылары төзек, бакча тулы аллы-гөлле чәчәкләр. Нинди генә үсемлекләр, агач-куаклар үсми анда?! Гомер буе ил өчен хезмәт иткән Нәҗибә апа белән Гыйндулла абый бер-берсен кайгыртып, бәхетле картлык кичерә. Сугыш хатирәләре әледән-әле күңелен тырнап торса да, Гыйндулла бабай шөкер итеп яши. 
Ләйлә Баянова. Баек.

Автор фотосы.