Якташыбыз Ләбиб Лерон җәлилчеләргә багышланган яңа проект турында: Аларны оныттырмау максаты тора

«Бу проектның идеясе 2015 елдан ук яшәп килде. Журналга язылу, почталар белән бәйле төрле сәбәпләр булгач, ул фикер икенче планга калып торды. Быел җәлилче-кормашчыларның җәзага тартылуына 80 ел булгач, бу проектны башлау тәкъдиме белән Бөтендөнья татар конгрессына бардым, киңәшләштем. Бергә эшләсәк, нәтиҗәсе дә яхшырак булыр, дидем», – дип аңлатты ул.

Баш мөхәррир сүзләренчә, Бөтендөнья татар конгрессының Милли шура рәисе Васил Шәйхразыев та, башкарма комитет җитәкчесе Данис Шакиров та бу фикерне хуплаган.

«Җәлилчеләрнең авыллары ни хәлдә, анда яшиләрме, мәктәпләр бармы, исемнәр бирелгәнме, искә алалармы бу шәхесләрне – шул сораулар кызыксындыра. Дөрес, кайберләрен искә алып торалар. Абдулла Алиш, Муса Җәлил ел саен искә алына. Марий Элда мәктәп Гайнан Кормаш исемен йөртә, мәсәлән. Чит төбәкләрдән чыккан Әхмәт Симай, Әхәт Атнашевларга мөнәсәбәт ничек икән? Аларны оныттырмаска дигән максат тора», – дип сөйләде ул.

Аның фикеренчә, көтелмәгән мәгълүматлар да килеп чыгарга мөмкин.

«Гомерләрен кызганмаган шәхесләрнең барысын да тигез дәрәҗәдә искә алырга тиешбез. Алар арасында биш шагыйрь дә бар. Барысын да истә тотарга кирәк. Бу проектның беренче бәләкәй нәтиҗәләрен 25 августка күреп булмасмы дип өметләнәбез», – дип сөйләде ул.

«Безнең мирас» журналының баш мөхәррире Ләбиб Лерон, «Мәдәни җомга» газетасының баш мөхәррире Вахит Имамов, «Казан утлары» журналы баш мөхәррире Рөстәм Галиуллин, Бөтендөнья татар конгрессының Башкарма комитеты җитәкчесе урынбасары Разил Зиннәтуллин, «Татар-информ» хәбәрчесе Гөлүзә Ибраһимова бүген җәлилче Әхмәт Симаевның туган авылына юл тотты. Ул тумышы белән Мордовия республикасының Усть-Рахмановка авылыннан. Исегезгә төшерәбез, «Интертат» электрон газетасында «Җәлилчеләр җире» проектын башлап җибәргән идек. Җәлилчеләрнең туган авылларыннан репортажлар циклын әзерлибез.

Фото – Татар-информ архивыннан