Җиңү көнен якынайткан солдат

Баек авылында гомер итүче Бөек Ватан сугышы ветераны Салих ага Госманов Җиңү бәйрәмен зур дулкынлану белән каршы ала. 1944 нче елның 1 гыйнварында фронтка киткән якташыбыз бик күп шәһәр һәм авылларны дошманнан азат итүдә батырларча көрәшә. Каты бәрелешләрнең берсендә контузия ала, икенче төркем инвалид булып туган авылына кайта. Сәламәтлеге ныгыгач, колхозда хезмәт куя. Күпне күргән, күпне кичергән ветеран: “Илләребез тыныч булсын, кабат сугыш афәтләрен күрергә язмасын!” – дип тели.