Һәйкәл булып Тукай кайтты

1 ноябрь 2026 - 14:00 Автор:

Лилия Шәймиева

Мөслимдә татар халкының бөек шагыйре Габдулла Тукайга һәйкәл ачылды

Алтын көздә – Тукай рухы

Урамда алтын көз хакимлек итә. Көзге кояш агачларны сары төскә буяган, һавада тынлык һәм сафлык. Бу матурлык үзе генә дә Тукай шигырьләрен искә төшерә. Милләтебезнең бөеклеген күрсәтүче Габдулла Тукай исемендәге скверда шагыйрь истәлегенә һәйкәл ачылды.

– Бу сквер гади урын түгел, ул – безнең рухи картабызның үзәге! Монда тарих белән бүгенге көн янәшә тора. Бөек шагыйребез Габдулла Тукай һәйкәлен рәссам, сынчы Халит Миңнегалиев ясады.

Район горурлыгы һәм юбилей

Скверда районыбызның горурлыгы булган, хөкүмәтебез тарафыннан бирелүче иң зур бүләк – Тукай премиясенә лаек булган олпат әдипләр: Зөлфәт, Фоат Садриев, Факил Сафин, Ләбиб Леронның фотосурәтләре урын алган. Якташ язучыларның һәрберсе – Тукай традицияләрен дәвам итеп, үз кыйблаларына тугры калган шәхесләр. Алар безгә туган телнең матурлыгын, халык рухының көчен күрсәтә, – диде район башлыгы Альберт Хуҗин һәйкәлне ачу тантанасында.

Быел шагыйрь, тәнкыйтьче һәм публицист Габдулла Тукайның тууына 140 ел тулды. Районыбыз Тукайның туган көнен зурлап билгеләп үтте.

Мөслимдә татар рухы яши

Тукайның туган көнендә халык Тукай скверына килә, аның шигырьләрен укый. Бүген шагыйрь үз исемен йөртүче скверда, үз исемендәге урамда мәңгелеккә калачак.

– Мөслим, республикабыздагы башка районнардан аермалы буларак, татар рухы, татар мәдәнияте белән янып яши. Мөслимдә татар теле һәм әдәбияты көннәре икешәр көн үткәрелә, җирлеккә ел саен берничә дистә язучылар килә. Мәктәпләрдә балалар белән очрашулар безгә иҗат итәргә канатлар куйгандай тоела. Бүген чарада 4 яшьлек бала шигырь укыды. Күзләргә яшь килде, ә күңелдә – горурлану хисләре!

Буыннар чылбыры һәм шагыйрь сүзе

“Бездән соң да килгән буын”, – дип сөйли сабый, шаккатмалы! Димәк, Тукай шигырьләре тагын бер гасыр яшәячәк! Татар рухын күңелгә беркетеп, биеклеккә күтәреп һәйкәл ачу – зур вакыйга бит ул! Татар яшәгән һәр төбәктә Тукай рухы, Тукай сурәте, Тукайга һәйкәл булырга тиеш! – диде ТР Язучылар берлеге рәисе урынбасары Факил Сафин.

Чара укучыларның чыгышлары белән үрелеп барды. Печән базары күренеше шагыйрьнең балачагына алып кайтты.

– Габдулла Тукай – халыкның йөрәге, безнең телебезнең алтын казнасы. Аның сүзе вакыттан өстен: ул бүген дә безне тыңлый, бүген дә безгә юл күрсәтә.

Мәңгелеккә калган иҗат

Әлеге сквер – районның мәдәни үзәге. Һәр көнне мөслимлеләр, Мөслимгә килгән кунаклар шушы юлдан үтеп йөри. Тукай – балаларның да, өлкәннәрнең дә яраткан шагыйре. Дөньяда бик аз гына яшәсә дә, ул безгә га-җәеп зур байлык – үзенең иҗатын калдырды. Ятимлектә, үксезлектә узган балачагы шигырь юллары булып безнең көннәргә әйләнеп кайтты. Зур горурлык хисләре һәм илаһи мәхәббәт белән телгә алынучы Тукай исеме халкыбызның йөзен дә, рухи асылын да чагылдыра. Еллар үткән саен биеккәрәк күтәрелә баручы шагыйрь баш очында балкып тора. Тукай – якты йолдыз ул! Ул бездән соң да, юл ярып, алга барачак!