Бу көнне Мөслимдә

Егетләр нигездә механизаторлык һөнәрен сайласа, 13 кыз терлекчелеккә килде. Берәүләре савымчы, икенчеләре бозау караучы булып эшли башлады... Мәктәпләрдә тиздән соңгы звонок яңгырар. Быел да безнең унынчыларыбыз – барлыгы 12 егет һәм кыз – класслары белән туган авылында кала. Һәркайсының эш урыны билгеле. Ә урта мәктәпне былтыр тәмамлап эшкә килгән яшьләребезнең теләгәннәре югары һәм махсус урта уку йортларына китеп белем алачак. Егетләребезнең байтагы Совет Армиясе сафларына китте. 
З. Фәхразиева, 
“Трудовик” тәҗрибә-җитештерү хуҗалыгының комсомол оешмасы 
секретаре. 
30 май 
Пассажир турында кайгыртып 
Иң элек пассажирлар шатланып кабул итәчәк хәбәрне җиткерәсе килә. 1 июньнән алып Мөслимнән Казанга ике рейс ясала башлаячак. Димәк, билетлар сатуда да иркен булачак. Алдан билет алалмый калучыларга очышка бер тәүлек кала яки очыш көнендә урын булу-булмау мәсьәләсендә аэропортка мөрәҗәгать итәргә киңәш бирәбез. Очышларны халык яратып өлгергән Л-410 самолеты башкара. Беренче рейсны 8 сәгать 15 минутта озатабыз. Икенче рейс самолеты 14 сәгать 25 минутта күтәрелеп китә... 
Р. Һилалов, 
аэропорт начальнигы. 
Сәхифәне Мөнирә Арсланова әзерләде.

Фото - Pixabay.com