Бу көнне Мөслимдә. 1980 ел вакыйгалары

admin, 3 апрель 2019 - 08:51

876

Әлеге рубрикадагы язмалардан төрле елларда “Авыл утлары” газетасында яктыртылган вакыйгалар, яңалыклар хакында белерсез.

1980

Чөгендердән – мул уңыш
“Трудовик” тәҗрибә-җитештерү хуҗалыгының Ташлыяр бүлекчәсендә узган ел азык чөгендере 49 га мәйданда игелде. Барлыгы 12681 ц тамыразык уңышы җыеп алынды...
Быел азык чөгендерен сугарулы участокларда игәчәкбез. Сугаруны минераль ашламалар кулланып башкарачакбыз. Бу участокның һәр гектарыннан 600-700 ц уңыш алуны тәэмин итәчәк... Шушы сугарулы участокларда бөтен мөмкинлекләрне файдаланып, һәр гектардан 60-70 ц азык берәмлеге җитештерүне планлаштырабыз.
Г. Мәгалимов,
Ташлыяр бүлекчәсе агрономы.
***
“Урожай” колхозы хезмәтчәннәре тагын бер җиңү яуладылар: ит сату буенча бишьеллык халык хуҗалыгы планы срогыннан алда үтәлде. Бу чорда терлекчеләр кабул итү пунктларына 20732 ц ит озаттылар. Яртыеллык план да уңышлы хәл ителде – һәрберсе 456 кг кадәр симертелгән 229 баш мөгезле эре терлек, уртача авырлыклары 100 кг булган 1212 баш дуңгыз – барлыгы 2242 ц ит тапшырылып, план үтәлеше 104 процент тәшкил итте. Колхозның сөтчелек тармагы эшчәннәре бу бишьеллыкта дәүләткә 71400 ц сөт сатарга тиеш иде. Ул 93 процентка үтәлде. Урожайлылар сөт хәзерләүнең еллык планын Бөек Җиңүнең 35 еллыгына үтәп чыгу өчен көрәш җәелдерделәр.
***
Арттырып үтәдек
Матур гадәтебезгә тугры калып, быел да индивидуаль хуҗалыклардан сөт җыйнауның беренче квартал планын арттырып үтәүгә ирештек. Сыеры булган һәр хуҗалыкка 150-200 кг сөт сату максат итеп куелган иде. Инде аны арттырып үтәүчеләр дә булды... Максатыбыз – яртыеллык планын срогыннан элек үтәү.
К. Шәйхәйдарова,
Әмәкәй авыл советы башкарма комитеты председателе.
***
Сенаж башнялары
кайгырту сорый
Районның барлык хуҗалык-ларында диярлек сенаж башнялары бар. Әмма алардан тиешенчә файдалана белүче, азыкны салу, саклау, терлекләр өчен алу технологиясен төгәл үтәүче генә аз...
Моннан 30-40 ел элек силос башняларын тутыру да, бушату да кулдан булган. Ә хәзергеләрдә тулысынча механикалаштырылган. Тик кайбер хуҗалыклар элеккеге шартларны кулайрак күрә. М. Горький исемендәге колхозда 2 тонна авырлыктагы бушаткыч башня уртасында асылынып калган, стена читләренә таш кебек тыгызланган сенаж каткан. Ә төптә берничә терлекче сәнәк белән сенаж каера. Карап торырга ук куркыныч! Ә колхозда моңа күнеккәннәр...
Н. Мөхәммәтҗанов,
слесарь-көйләүче.
Сәхифәне Мөнирә
Арсланова әзерләде.