Батырларыбызны беләбезме?

Яшьтәшләрем  кебек, безнең  өчен  тудырылган мөмкинлекләрдән  файдаланып каласым  килә.  Дәресләр  бетүгә сәнгать  мәктәбенә  ашыгам.  Анда безне,  ягымлы  елмаеп,  укытучыбыз  Мөршидә  апа  Әхмәтҗанова каршы  ала.  Ул  безгә  вокал дәресләре  бирә,  дөрес  һәм  матур  җырлау  серләренә  өйрәтә. Без,  аның  укучылары,  “Йолдызлык”  фестивальләрендә,  район һәм  зона  конкурсларында  катнашабыз, призлы урыннар алабыз.
Гомумән,  бу  тормышта  мине бик  күп  әйберләр  кызыксындыра:  Мөслимебездә  көн  саен  диярлек  булып  торган  яңалык  һәм үзгәрешләр  дә,  җирлегебездәге тарихи  урыннар  да.  Бүгенге яшьләр  үзләре  яшәгән  урам  исеме  белән  кызыксына  микән?  Ә мин  Бәдыйк  Салихов  урамында яшәвем  белән  чиксез  горурланам.  Каһарман  якташыбызның тормыш  һәм  хезмәт  юлы,  сугышчан  батырлыгы  турында  Мөҗәһит абый  Әхмәтҗановның “Данлы Дусай”  дип  исемләнгән  китабыннан  укып  белдем.  2018  елның май  аенда  “Авыл  утлары”  газетасында  басылган  Бәдыйк  Салихов  турындагы  язма  да  герой  хакындагы  мәгълүматларны  тулыландырырга  ярдәм  итте.  Ул  материалны  да  үземдә  саклыйм.  Дан орденнарының  тулы  кавалеры, башка  сугышчан  бүләкләр  иясе Б.Салихов  турында  апайларыма да  сөйлим.  Ә  7  яшьлек  Шамил  апаем:  “Үскәч,  мин  батыр  солдат  булачакмын”,  –  ди.  Ә  мин:  “Безгә  сугышлар  күрергә  язмасын,  кан  коюлар  кабатланмасын.  Илебез  халыклары  тыныч,  бәхетле  тормышта яшәсен!” – дип телим. 
Лиана Хәбибуллина, гимназиянең 9 б классы  укучысы.