Мөслим поликлиникасы участок терапевты – авыл җирлегендә универсаль белгеч

22 октябрь 2026 - 15:20 Автор:

Лилия Шәймиева

Гүзәл Хаҗиева – олы йөрәкле табибларның берсе

Авыл табибы – универсаль белгеч

Авыл җирлекләрендәге хастаханәләрдә тормыш салмак кына бара, һәм нәкъ менә монда табиб үз пациентлары өчен психолог та, киңәшче ролен дә берләштерә. Район поликлиникасы терапевты, участок табибы Гүзәл Хаҗиева – шундый олы йөрәкле табибларның берсе. 2018 елдан ул биредә хезмәт куя. Поликлиникада кабул итү алып бара, пациентлар янына өйләренә дә бара. Бу бигрәк тә белгечләргә керү мөмкинлеге чикләнгән авыл җирлегендә мөһим.

– Моннан сигез ел элек Казан дәүләт медицина университетының “Дәвалау эше” факультетын тәмамлап Мөслим поликлиникасына эшкә кайттым. Үз эшемне бик яратып башкарам. Диагноз кую гына түгел, ә пациентка әхлакый яктан ярдәм итәргә, барысын да гади телдә аңлатырга, кайчакта мәгълүмат җитмәү аркасында килеп чыга торган сорауларга җавап бирергә кирәк. Минемчә, участок терапевты ул универсаль белгеч булырга тиеш: диагнозны ачыклаучы да, консультант та, катлаулы хәлдә ярдәмгә килергә әзер кеше дә. Заманча медицина даими үсеш таләп итә. Үзлегемнән белемемне күтәрү өстендә эшлим, медицинага кагылышлы китапларны укырга, бу өлкәдәге яңалыклар белән танышып барырга яратам, – ди табиб.

Нәселдән килгән һөнәр

Гүзәл Хәмитовна – медицина университетын яхшы билгеләргә тәмамлаган һәм терапия буенча ординатура узган белгеч. Аның хезмәт юлы мәктәп елларында ук барлыкка килгән медицина турындагы хыялдан башлана. Әнисе дә, әбисе дә авылда фельдшер булып эшләгәннәр. Тирә-юньдәге кешеләрнең тормышын яхшырак итү теләге аны да медицинага алып килгән. Авылдашларының, сәламәтләнеп, әнисенә, әбисенә изге теләктә булулары Гүзәл Хәмитовнаны шушы изге һөнәрне сайларга илһамландыргандыр, мөгаен.

– Мәктәпне тәмамлагач, мин башка һөнәр сайлау турында уйламадым да. Укырга керергә мәктәп елларында ук әзерләнә башладым. “Дәвалау эше” юнәлеше буенча диплом алдым. Биредә уку кыен булса да, бик кызыклы иде, бигрәк тә өлкән курсларда. Практиканы Сарман районы хастаханәсендә уздым, монда яхшы тәҗрибә тупладым, – ди Гүзәл Хаҗиева.

Халык ышанычы һәм хезмәттәшләр бәясе

Участок терапевты халык белән аңлашып эшли. Сигез ел эчендә ул мөслимлеләрнең ышанычын һәм мәхәббәтен яулады.

– Гүзәл Хәмитовна даими рәвештә квалификация күтәрү курслары уза. Бүген ул тәҗрибәле һәм сизгер доктор статусына ия. Чөнки ул үз пациентларын тыңлый һәм ишетә белә. Ә бу – табиб өчен иң мөһим сыйфат. Табиб белеменә һәм тәҗрибәсенә таянып, кискен ситуацияләрдә карарларны тиз кабул итә белергә тиеш. Кешенең киләчәк язмышы кайчак бу карарларның дөреслегенә бәйле бит! Үзе дә һөнәр сайлавында бер генә минут та шикләнмәде. Аның әнисе шәфкать туташы булган, аның олы апасы да медицина юлыннан киткән, – ди район хастаханәсенең баш шәфкать туташы Рәзилә Хәбибуллина.

Терапевтның катлаулы хезмәте

Әйе, участок терапевтына даими рәвештә төрле кешеләрдә теге яки бу авыру булу-булмавын бик чикләнгән вакыт эчендә ачыкларга туры килә. Әгәр стационарда табибларның диагноз кую өчен якынча өч көне бар икән (бу вакытта дәвалау күпкә иртәрәк башлана, бигрәк тә пациентның хәле авыр булса), поликлиникада гомуми тикшерү уздыруга, анамнез җыюга терапевтның вакыты нибары 10 минут чамасы гына. Шул ук вакытта ул бик күп төрле документлар тутырырга тиеш. Шулай булгач, участок терапевты – ул чын-чынлап катлаулы һөнәр. Гүзәл Хәмитовна сигез ел буена боларның барысын да уңышлы башкарып килә.