Алдарларны үз юләрлегегез белән баетмагыз!

Соңгы ике көндә мошенниклар Мөслимне “штурмга” алды, дип хәбәр итә район эчке эшләр бүлегенең уголовный розыск бүлеге җитәкчесе Булат Замалиев. Бүлекккә зыян күргән дүрт райондашыбыздан гаризалар кергән. Соңгысында зыян күрүче картасындагы 90 мең сум акчасыннан колак каккан. Мошенниклар, гадәттә, үзләрен банк хезмәткәрләре итеп таныштыралар һәм “сезнең исемгә кредит рәсмиләштергәннәр” яисә “сезгә тотылган акчаларыгыздан процент кайтаралар” кебек шушындый һәм тагын бик күп сәбәпләр табып, карта номерларын сорыйлар. Шуны онытмагыз: банк хезмәткәрләре сездән беркайчан да карта номерларын сорамый! Карта номерларын сораучы – мошенник! Алдарларны үз юләрлегегез белән баетмагыз!