Суд карары чыкты

17 апрель көнне мировой судья спиртлы эчемлекләр кулланган хәлдә рульгә утырган Нургалимов эшен карады. Ул гаебен танымады.
– Мин көчле дарулар эчәм. Шуларның тәэсире бу. Гаепле түгел мин. Сез мине акларга тиеш, башка бер сүз дә әйтмим, – диде Нургалимов.
Райондашыбызның канында спиртның нормадан ике мәртәбә артык булуы ачыкланган. Гаепләнүче гаебен видеоязма карагач та танырга теләмәде. Видеоязмада Нургалимов хокук сакчыларына шушы ук “әкиятне”: дарулар эчүен, авыруы турында сөйләде. Нургалимовның хәмер куллануын аның хәрәкәтләре, аягында көчкә басып торуы да аермачык күрсәтә иде.
– Бик күпләр спирт исе килүен һәм махсус приборның алкогольнең нормадан күп булуын күрсәтүен дарулар белән бәйләргә ярата. Алкотестер ярдәмендә алкогольле эчемлекләр генә ачыклана, – ди районның ДАИ җитәкчесе Феликс Мәгъданов.
Административ җинаять кылганы өчен Нургалимовка суд тарафыннан 30 мең сум штраф билгеләнде һәм 1 ел да 7 айга транспорт белән идарә итү хокукыннан мәхрүм итү турында карар чыгарылды. 

Фото – Татар-информ архивыннан