Суд карары чыкты

Кылган гамәлләренә дәлил буларак күрсәтелгән видеоязманы күрсәткәч тә, Нигъмәтуллин гаебен танырга теләмәде. – Болай да ике елга якын машина руле артына утырмадым бит инде. Хәзер тагын “лишать” итәсезмени? Мөслимдә бер мин генә исерек килеш йөрмим. Мин ул көнне эчмәдем, мин эчүне бөтенләй ташладым, – диде Нигъмәтуллин.
Видеоязмадан күренгәнчә, ДАИ инспекторлары тоткарлаганда, Нигъмәтуллинның машина руле артына тормыш иптәше күчеп утыра. Тик видеокамералар ярдәмендә руль артында моңарчы кем утырганын ачыклау кыен булмый.

– Нигъмәтуллин 2021 елда да алкогольле эчемлекләр кулланып тоткарланган иде. Тик ялгышларыннан сабак алмаган. Машина руле артына эчеп утырган өчен аңа кабаттан машина йөртү таныклыгыннан баш тартырга туры киләчәк, – диде районның ДАИ җитәкчесе Феликс Мәгъданов.
Административ җинаять кылганы өчен Нигъмәтуллинга суд тарафыннан 30 мең сум штраф билгеләнде һәм 1 ел да 7 айга транспорт белән идарә итү хокукыннан мәхрүм итү турында карар чыгарылды.

Фото - "Татар-информ" архивыннан