Көтелмәгән кунак

Район прокуратурасы 61 яшьлек мөслимлегә карата җинаять эше буенча гаепләү актын раслады. Әлеге зат РФ Җинаятьләр кодексының 139 маддәсе 1 бүлегендә каралган җинаять кылуда гаепләнә, ягъни ул рөхсәтсез чит кеше йортына кергән.
– Тикшерү версиясе буенча 2023нче елның 25 гыйнварында 10 сәгать 54 минут тирәсендә бу ир-ат Мөслим авылының Пушкин урамында яшәүче берәүнең фатирына законсыз төстә үтеп кергән, – ди район прокуроры урынбасары Линар Әскаров.
Ир-ат үз гаебен тулысынча таныды. Җинаять эше тикшерү өчен мировой судка җибәрелде, дип хәбәр итәләр район прокуратурасыннан.

Фото "Татар-информ" архивыннан.