Укучылар тәртип ярата

Олы Чакмак мәктәбендә эшләүче “Экодобро” экология отрядына 2010 елда нигез салынган. Волонтерлар отрядын Миңнур Нәгыймова җитәкли.

– Мәктәбебезнең экология отряды бик күп бәйгеләрдә катнаша. “ЭкоЯз”, “Татарстан. Чиста булачак!” “Эквест” чараларында да сынатмыйбыз. Отряд җитәкчесенең бу юнәлештәге эшчәнлеге аның табигатькә якын фәннәрне укытуына да бәйледер. Миңнур Нәгыймова, педагог-оештыручы булудан тыш, музыка, технология, рәсем дәресләрен дә укыта. Мәктәбебездә бер генә укучының да экологиягә бәйле чаралардан читтә калганы юк, – ди Олы Чакмак мәктәбе директоры Наилә Шәфигуллина.

Олы Чакмак мәктәбендә 31 укучы белем ала. Алар барысы да экология юнәлешендәге эшчәнлеккә җәлеп ителгән. Экология түгәрәгенә йөрүчеләр, волонтерлар отряды, төрле проектлар әзерләп, фәнни-тикшеренү эшләре белән экологик конференцияләрдә чыгыш ясый. 

– Олы Чакмак авылы әрәмәлек һәм урман поласалары белән әйләндереп алынган, экологик яктан чиста авыл булып исәпләнә. Чисталык булдыруда мәктәп укучыларының да, авыл халкының да өлеше зур. Су буйларын, әйләнә-тирәбезне чиста тотарга өйрәнгән балалар киләчәктә дә табигать сагында торачак, – ди Миңнур Нәгыймова.

Гөлия Гарипова җитәкчелегендә “Экология безнең тирәдә” түгәрәге дә, “Үсеш ноктасы” үзәге дә уңышлы гына эшли.

Тулырак "Авыл утлары" газетасының 2025 ел 30 апрель санында укыгыз

Лилия Шәймиева фотосы