Мөслим-информ

Муслюмовский район

18+
2024 - Гаилә елы
Яңалыклар

Яшьләр үз куышын булдыра ала

Сер түгел, бик күпләрнең үз куышын булдырасы килә. Аеруча яшьләр, әти-әни канаты астыннан чыгып, үз йортында яки фатирында яшәргә тели. Элек халык, чиратка басып, бушлай фатир алу мөмкинлегеннән файдаланган. Бүген бу мәсьәлә катлаулырак.

Яшь гаиләләргә “Гражданнар­ны уңайлы торак һәм коммуналь хезмәтләр белән тәэмин итү” РФ дәүләт программасының бер өлеше булган “Татарстан Республикасында яшь гаиләләрне торак белән тәэмин итү” программасы эшли. Аның ярдәмендә дәүләттән субсидия алу мөмкинлеге бар. Безнең җирлектә дә шушы программа нигезендә торак алу мөмкинлеге булдырылды, – ди яшьләр белән эшләү һәм спорт бүлеге җитәкчесе Илшат Яббаров.

Әлеге программа буенча яшь гаиләгә бюджеттан йорт яки күпфатирлы йортларда фатир са­тып алганда күчемсез милек суммасының 35 процентын “каплау” өчен акча алырга мөмкин. Программа нигезендә беренче чиратта гаиләнең торакка ихтыяҗы игътибарга алына. Дәүләт ярдәменә дәгъва иткәндә яшь гаиләнең торак шартларын яхшыр­туга мохтаҗ булуы расланырга тиеш. Гаиләдә бер кешегә туры килгән то­рак мәйданы 18 квадрат метрдан ар­тмаска тиеш.

– Программага керү өчен гаиләнең рәсми төстә никахлашкан булуы һәм ир белән хатынга 35 яшь тулмаган булу шарт. Элек яшь гаиләнең бюд­жетта эшләве таләп ителә иде. Бу программаның өстенлеге – яшь гаиләнең нинди өлкәдә эшләве мөһим түгел. Дәүләттән бирелгән субсидия кире кайтарылмый. Программаның гамәлгә ашырылу­ында Татарстанның яшьләр эшләре буенча министрлыгының өлеше зур. Социаль программалар ярдәмендә күп гаиләләр торак мәсьәләсен хәл итәрләр, дип ышанам, – ди Илшат Яб­баров.

Моңа кадәр дә яшьләр фатир ал­мый, йорт салмый тормады анысы. Тик бюджет өлкәсендә эшләмәүчеләр өчен кыенлыклар булгалады. Аларны йорт салган кеше үзе генә беләдер. Программаны гамәлгә ашыручылар аның демографик хәлне яхшыртыр­га булышуына да өметләнә.

– Программада тулы булмаган гаилә дә (ялгыз бала үстерүче ана яки ата) катнаша ала. Дәгъва кылучының Татарстанда яшәве һәм пропискасы булуы, эшләве (үзмәшгуль булса да ярый) шарт, чөнки банктан ипотека кредитын түләп бару мөмкинлеге ту­рында белешмә таләп ителә, – ди Ил­шат Яббаров.

Бүгенге көндә Мөслимдә торакның бер квадрат метры – 25093 сум. Әлеге сумма квартал саен үзгәреп тора.

Программада катнашырга теләк белдерүчеләр 1 июньгә кадәр, кирәкле документларны туплап, рай­он яшьләр белән эшләү һәм спорт бүлегенә тапшырырга тиеш. Әлеге бүлек “Мизгел” яшьләр үзәгенең икенче катында урнашкан. Торак бәясе документларны тапшырган көннән чыгып исәпләнә. Гаиләнең программага кертелүе октябрь аенда каралачак. Узган ел “Яшь гаиләләрне торак белән тәэмин итү” программа­сы буенча җирлегебездә ике гаилә до­кументлар тапшырган.

Программада катнашучылар­га, дәүләттән субсидия алып, бе­ренчел яисә икенчел торак сатып алырга да була. Средстволарны йорт төзелешенә юнәлтергә дә мөмкин. Бу очракта килешү төзелеп, акча йорт төзүче оешманың исәп-хисап счеты­на күчерелә.

Лилия Шәймиева.

Фото – “Мөслим-информ” архивыннан.

Следите за самым важным и интересным в Telegram-каналеТатмедиа

Безнең телеграм каналга кушылыгыз! Телеграм-канал

Без "Дзен"да! Дзен


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Реклама